Prima Timotee Capitel Cinch

Quel articul chì l'è scrivüü in Lumbard, cun l'urtugrafia insübrica ünificada.

Prima Timotee

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Cinch

¹Castiga no un anzian ma dumanda cuma un pader, giüìtt cuma fradèj, ²donn anziann cuma mader, giüìnn cuma surèj in de tüta la püritaa.
³Da únur a veduv che hinn veramént veduv. ⁴E se una qual vedua la gh'ha fiöö o neúd, gh'avarìen d'imparà prima a mustrà pietaa a la lur propia cà e de dà indree recumpénsa a i lur gént: già che chèst l'è cetabil denanz a Diu. ⁵Ma lee che l'è veramént vedua e lassada sula l'ha speraa in de Diu e la cuntinüa in di sò süplegh e preghér nocc e dì, ⁶e lee che la se banduna a i piasè l'è morta intanta che la viv. ⁷E cumanda chèstcoss, perchè sien ireprensibij. ⁸E se quajdün di lur propi personn e spezialamént de la lur propia cà el ghe pruved no, l'ha renegaa la féd e l'è pegiúr de lü che 'l cred no! ⁹Una vedua la gh'avarìa de vèss iscritt se la gh'ha no mén de sessanta agn, miee de vün marì, ¹⁰la gh'ha testimunianza di bonn laur, se l'ha levaa sü bagaj, se l'ha lugiaa i furestee, se l'ha lavaa i pee di sant, se l'ha jütaa quij che hinn aflitt, se l'è nada adree ogni bun laur. ¹¹E refüda veduv giüìnn: già che quand senten desidéri sessüaj via del Crist, vören maridà, ¹²avendugh cundana perchè tajen föra la lur prima féd; ¹³e ancasì imparen andà in gir i cà e fà nagott, e no dumà fà nagott ma anca vèss ciciarètt e indiscrètt, e dì coss che gh'avarìen no de vèss parlaa. ¹⁴Dunca, vöri che i giüìnn mariden, gh'àbien fiöö, menen i afar de la cà, dann a nissün un'upurtünitaa a lü che l'uponn per via de maldicénza; ¹⁵già che quij hann già giraa via dedree a Satana. ¹⁶Se quajdüna fedèla la gh'ha veduv, la gh'avarìa de jütàj e la gésa la gh'avarìa no de vèss pesada, perchè la jüta quij che hinn veramént veduv.
¹⁷I anziann che regnen bén hinn dègn d'un unúr dopi, spezialamént quij che travajen in de parola e in d'insegnamént. ¹⁸Già che la dis la Scritüra: «Te metaree minga el bucanèll sü un bö che 'l trabata 'l gran», e: «El laurant l'è dègn de la sua recumpénsa». ¹⁹Ricev tì minga un acüsa cuntra un anzian, ecett se l'è sü düü o trii testimon. ²⁰E castiga i pecaa denanz a tücc, perchè 'l rest el gh'ha pagüra.
²¹Duu testimunianza denanz a Diu, Crist Gesü e i angiuj scernii, che te vardet chèstcoss sénza pregiüdizi, fasend nagott segund parzialitaa. ²²Mett i man sü nissün sveltamént, né partecipa in di pecaa di alter personn: tegnet té medemm pür. ²³Bev pü aqua, ma duvra un puu de vin per via del stumegh e i sò malatì despess.
²⁴I pecaa de quij personn hinn manifest e menen innanz al giüdizi, e anca vann adree quij; ²⁵in de l'istèssa manéra, anca i bonn laur hinn manifest, e quij che gh'hinn sedenò, poden minga vèss scundüü.

Navigaziun

• ← Indree a Capitel Quater
• Inanz a Capitel Ses →
• A l'indes