Prima Timotee Capitel Trii

Quel articul chì l'è scrivüü in Lumbard, cun l'urtugrafia insübrica ünificada.

Prima Timotee

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Trii

¹La parola l'è fedéla. Se quajdün el desidera a vèss un vescuv, el desidera un bun laur. ²Dunca, l'è necessari che el vescuv el sia ireprensibil, el marì d'una dona, temperaa, cuntrulaa, mudést, amant di furestee, capaz d'insegnà, ³né ciuch né pügnaz, ma gentil, no resiús, sénza 'l bén de danee, ⁴che 'l regna sura la sua propia cà, che 'l gh'ha bagaj in de sutamissiún, cun tüta dignitaa ⁵(e se quajdün el sa minga regnà sura la sua propia cà, cuma 'l gh'avarà cüra de la gésa de Diu?), ⁶no un neofita, perchè, despö che 'l sia sgunfiaa cunt urgöj, el burla no giò a la cundana del diàul. ⁷E l'è necessari che 'l gh'àbia una bona testimunianza de quij de föra, perchè 'l burla no giò in de la sarada e la trapa del diàul.
⁸In de l'istèssa manéra, i diacun gh'avarìen de vèss unurabij, avègh minga lengua dupia, no daa a tant vin, no ravàs de danee, ⁹avègh el mistéri de la féd cunt una bona cusciènza. ¹⁰E anca chèst gh'avarìen de vèss pruaa prima, alura gh'avarìen de servì, essend ireprensibil. ¹¹In de l'istèssa manéra, i donn gh'avarìen de vèss unurabij, no calüniús, temperaa, fedèj in de tüsscoss. ¹²I diacun gh'avarìen de vèss marì d'una dona, e de regnà sura i lur bagaj e sura la lur propia cà. ¹³Già che quij che serven bén utegnen per lur medemm un bun nivel de repütaziún e tanta cunfidénza in de la féd che l'è in del Crist Gesü.
¹⁴Mì te scrivi chèstcoss, sperand a vegnì a tì prèst; ¹⁵e se m'intardia, l'è perchè te sàpiet cuma l'è necessari de cumpurtàss in de la cà de Diu, che l'è la cà de Diu vivent, un pilon e süport de la veritaa. ¹⁶E sénza cuntruversìa, grand l'è 'l misteri de la pietaa:
che l'è staa faa manifest in de la carna,
l'è staa faa giüst in del Spirit,
l'è staa vedüü di angiuj,
l'è staa pruclamaa intra i naziún,
l'è staa credüü in del mund,
l'è staa levaa sü in de la gloria.

Navigaziun

• ← Indree a Capitel Düü
• Inanz a Capitel Quater →
• A l'indes