Regn dei Lombards

Desambiguazion – Qell articol qé al parla de ol regn latin-jermaneg. Se ta seet dree a circar un olter signifegad, varda Regn de Lombardia.

Quell articol qì l'è scrivud in Lombard, cond l'ortografia Scriver Lombard.

Ol Regn dei Lombards, cognossid anc come Regn Lombard (latin: Regnum Langobardorum, jermaneg antig: Langbardland), plu tarde anc come Regn de tuta l'Italia (latin: Regnum totius Italiae), l'era un regn volt medieval cread dei Lombards (o Longobards per distinguer-i dei lombards modern), un popol jermaneg, ind el VI secol d.C. A'l prencepe i ha conquistad la Pianura Padana, per po rivar a controllar anca asquas tuta la penisola italega.

Regn dei Lombards

(detai)

Daits aministrativ

Nom ufiçal

Regnum Langobardorum
Regnum totius Italiæ

Oltre capital

Monça, Milan

Politega

Rex Langobardorum

Orgen deliberativ

Gairethinx

Nassida

568 con Alboin

Causa

Invasion lombarda de la Pianura Padana

Fin

774 con Desideri

Causa

Toma de Pavia

Territore e popolazion

Zona jeografiga

Italia

Relijon e societaa

Relijon principala

Catolicesim

Relijon de Stat

Arianesim fina al VII secol, po catolicesim

Relijon minore

Paganesim

Class soçai

Ariman, Aldii, Romaneg

Evoluzion territoriala del Regn

Evoluzion storega

Prima al g'era

Imper Bizantin

L'è stait sostituid da

Imper Carolinj

Ducad de Spolet

Ducad de Benevent

Storia

Fondazion del Regn

I Lombards i era orijinare de la Scandinavia, ma i s'era stabilids in Panonia despò de la guerra gotega. Ind el 568 ol re Alboin l'ha decidid de provar l'invasion dei territore bizantin de là dei Alp, per circar una sistemazion meiora per ol so popol.

La prima citaa a vesser conquistada l'è staita Cividal del Friul, indove l'Alboin l'ha nominad ol prim duca (Gisulf). Spazada vià ogne resistenza dei bizantin, i Lombards i ocupa tuta la part volta de la Pianura Padana, da Cividal a Torin. La capitala l'è Pavia, qe l'è conquistada ind el 572 dop de quase tri agn de assede. Prope qé, tradid de la so moier Rosamunda (cond el so amant, l'Elmiqi), al troverà la mort ind el istess agn. Ol so sucessor al sarà ol Clef, qe al regnerà del 572 a'l 574.

Govern dei Duca

Per saver-n plussee, varda l'articol Govern dei Duca.

Despos de la mort del Clef (copad de un servidor), i duca i ha miga elejid un nœv sovran. A causa de la fraca del Baduari (576), mandad de l'imperador d'Orient per riconquistar i territore perdids, anc i Lombards a'l servizi de l'Imper i se revolta e i fonda i Ducads (indipendents de la Corona) de Spolet e Benevent. Ol govern dei duca al feness cond l'elezion del Autari ind el 584.

Teodolinda

Prima de morir, l'Autari ind el 590 l'ha sposad la Teodolinda, una principessa bavara. Ol nœv re, l'Agilulf, segond la lejenda l'è cernid de la stessa Teodolinda, qe la se sposerà con luu. Grazie a lee i Lombards (qe i era per la plu part pagan o arian) i començerà a convertir-s al catolicesim, e ind el so regn la cirqerà la conciliazion intra i dominador jermaneg e i popolazion romanege. Ge sarà anc ol passaj de la concezion fameiara del poder (i duca i era a cap del so clan, la fara) a qella territoriala.

Sota ol regnar de la Teodolinda g'è staita una granda produzion artistega. Dei ipotesi i dix qe anc'pò la Corona Ferrea la sies staita fabricada in qell period qé.

La rejina la seguiterà a governar anc dop de la mort del Agilulf e l'incoronazion del so fiœl Adaloald (anc'mò picinin). La so politega filo-catolega, però, la porta a una ribellion de la fazion ariana e a la guerra civila, vencida del arian Arioald ind el 625.

Rotari

Ind el 636 l'è salid al tronn ol Rotari, duca de Bressa, arian. Ol so governar l'è stait segnad de una espansion militara (l'ha ciapad la Liguria e ol rest de l'Emilia), e de la proclamazion del so Edit (643), qe al regoiva tute i lej dei Lombards. L'era scriit in latin, anc se l'era indirizad adoma ai jermaneg (g'era ol principi de personalitaa de la lej: ognun al seguiva ol dreit del so popol). Ol so regnar l'è finid ind el 652.

La Dinastia Bavaresa

Despò de la fin del regn del fiœl del Rotari, ol Rodoald (652-653), i duca i ha elejid l'Aripert I, duca de Asti e nevod de la Teodolinda. La retornava insé la dinastia Bavaresa, qe l'ha regnad fina al 712. La so politega filo-catolega la porterà a tante ribellion dei arian, qe a la fin i è però deventads una picola minoranza.

Liutprand

Dop de la mort del so pader Ansprand, ol prim sovran despò de la fin dinastia bavaresa, ind el 712 ol Liutprand l'è salid al trono. L'ha governad plu a long de tuts i olter sovran Lombards, fina a'l 744. L'ha strenjid una importanta lianza cond i Franc (e l'ha aidad plu volte ol Carl Martell contra i Saracen), e grazie a la so politega sprejudegada, l'è rivad a conquistar dei territore a'l Papa e a l'Esarcad de Ravena, e per la prima volta l'ha portad i ducads de Spolet e Benevent sota ol controll de Pavia.

Jamò del VI secol i romaneg i hiva començad a scalar i posizion ind la jerarqia sociala, e una part dei Lombards l'era inscambe deventada plu povera, e la pudiva plu garantir ol servizi militar. Donca ol Liutprand l'ha tirad vià l'oblig de leva per i Lombards qe i pudiva miga sostentar-s.

I ultem sovran

Sucessor del Liutprand l'è stait ol so nevod Ildebrand, descaçad vià dop una qualc mis del Raqis, duca del Friul. L'è stait un debol sovran, qe al g'hiva poca popolaridaa intra i Lombards. A la fin i duca i ha elejid come nœv re ol so fradell Astolf, e ol Raqis l'è indait in convent. Espression de la fazion lombarda plu conservatrix, l'ha inviad dei campagne militare qe i è culminade con la conquista de Ravena (751), sede de l'Esarcad bizantin. Per far-l, l'ha duxid far entrar i romaneg ind el esercet (adoma però come fanteria lijera).

Prope quand qe al sœmeava qe l'Astolf al fœss sul pont de vencer tuts i so nemix a sud dei Alp, ol Papa Stefan II l'ha ciamad in so aiut Pipin ol Brev, nœv sovran dei Franc, qe al venç l'Astolf do volte (754 e 756). I Lombards i g'ha de dar a'l Papa Ravena. L'istess ann l'Astolf al mœr e l'è incoronad ol Desideri, qe al g'ha ol gradiment dei Franc. Pian pianin al circa de recostruir ol regn in crisi.

La fin

Ol Desideri l'era dree a ciapar i prim resultads de la so politega (anc grazie ai division interne dei Franc), quand qe la mort del Carlomann (771) l'ha lassad camp liber al so fradell Carl Magn, qe ind el 773 l'ha traversad i Alp e l'ha ciapad Pavia ind el 774, despò de una dura resistenza lombarda. Ol Desideri l'è stait esiliad in Gallia, e ol so s'ciet Adelqi l'è indait a circar aiœt a Costantinopel. In manera formala, ol regn l'è miga stait desligad e l'è stait jontad a'l Regn Franc ind una union personala (ol Carl Magn l'era Gratia Dei rex Francorum et Langobardorum). I ducads ind la Langobardia Minor i è restaits fina a l'invasion dei Normands, ind el 1130.

Cartografia

Alboin
Interregnum
Agilulf
Rotari
Liutprand
Astolf

Riferiments

(LA) Paol Diacon, Historia Langobardorum (Wikisource)
(IT) Longobardi ind la Treccani