San Mattee
El Mattee, nassuu cont el nomm de Levi (Cafarnao, fin del I secol p.d.C. - Etiopia, metà del I secol) l'era on esattor di tass, prima de vess ciamaa del Signor a vess vun di dodes apostoi.
Tutta la tradizzion cristiana le recognoss 'me l'autor del Vangel de Mattee, indè che lu medemm el vegna ciamaa anca Levi o el publican: in ogni cas gh'è di esegeta del dì d'incoeu che contesten l'identificazzion.
El ven pitturaa 'me on vegg con la barba, e 'l gh'ha 'me simbol on angiol che l'è dree a ispiràll e a menà la soa man intant che lu el scriv el Vangel. Despess el gh'ha arent anca ona spada, el simbol del sò martiri.
In de la tradizzion popolar
ModifegaLa festa de San Mattee segond el calendari catolegh l'è 'l vintun de settember. La tradizzion popolar la gh'ha di proverbi a proposet de 'sto dì (che l'è vun di ultem de l'estaa)[1]:
- A San Mattee, el casciador el solta in pee.
- A San Mattee, el dord l'è in pee.
- De San Mattee, castegn/i crodei a tre a tre.
- De San Mattee la castegna o la va o la ven.
- A San Mattee, chi gh'ha 'na bella selva i vaghi a vedè.
- I pioveri de San Mattee o che i è davanti o che i è dedree.
- San Mattee, l'aqua fin ai pee.