Santuari de Santa Rita da Cascia (Milan)

Quest articol chì l'è scrivud in lombard, con la Noeuva Ortografia Lombarda

El Santuari de Santa Rita da Cascia a l'è un santuari de Milan, in del quarter de la Barona.^[1] Dedicad a la Rita da Cascia, a l'è una parochia part del decanad Barona-Giambellin de l'Arcidiocesi de Milan.

Storia

El santuari l'è stad volud di Gustinian, che un temp gh'haveven varie gese a Milan che hann perdud quand che inn stad soprimud del 1782, inscì de tornà in la capital lombarda, indova che el so fondador, el San Gustin, l'era stad batezad del Sant Ambroeus: la prima preja l'è stada mituda a la presenza del cardinal Schuster, che l'ha dad la soa benedizzion, ma i lavorà scomincen debon in la primavera de l'ann adree, con la guerra che i fà andà pian, e la comunità gustiniana la sarà fada su del 1941. ^[1]

La faciada a l'è fornida del 1956^[2] e 'l 21 de otover del 1959 el cardinal Montini el fa su la parochia de Santa Rita a la Barona.^[3]

Del 2000 a l'è mitud un altar noeuv, part de un renoeuvament del presbiter, indova che l'è anca mituda una cros inveci de la pitura de la Santa Rita. ^[2]

Architetura

A l'è stad progetad del Giuseppe Invitti e 'l gh'ha una pianta de basilega a cros latina con trè gran navade, la faciada a l'è in quadrei e cep bergamasch e caraterizada de 'n gran arch. ^[4] I lunete sora di portai gh'hann di mosaich del G.B. Salerno, menter el porton in bronz l'è ciamad porton de la vita e l'è stad fad del scultor gustinian Stefano Pigini, e 'l mostra la vita de la santa prima de fàss monega, o ben el morosàss, el maridàss, la vita in familia e i lavorà de cà. ^[4]

De dent, se troeuven varie capelle de lat ben decorade, cont un arch trionfal che 'l mostra el cadin de l'absid, con di mosaich che sarien stad fad del Leo Coppens: sora l'arch se troeuven i segn del Dia Pader e del Spirit Sant insema a l'agnell, de indova che la riva la gloria del spirit, con la Madona e vari sant che celebren la soa oeuvera de Salvador. ^[4] Al center del cadin se ved el Crist Pantocrator che, cont un tabarr ross, el se mostra in trionf in sul mond, a la soa mancina a gh'è la Santa Rita, tegnuda in pè de du pilaster con sora el Sant Gustin e 'l Giovann Batista, menter a destra gh'è i simboi di quater evangelista e i apostoi che representen l'unità de la Gesa, con sora un pann con scrit dent "beati qui ad cenam nuptiarum agni vocati sunt", fras latina tolta de l'Apocaliss che la voeul dì "beat quei che inn ciamad a la cena de matrimoni de l'Agnell". ^[4]