Sistema sanitari de la Svizzera

Quest articol chì l'è scrivud in lombard, con la Noeuva Ortografia Lombarda

El sistema sanitari de la Svizzera a l'è un sistema sanitari universal de tipo Bismarck fondad in su di casse malad privade che inn obligatori per tucc i resident in del Pajes e l'è regolad de la Lesg Federala in su la Sigurazzion Sanitaria.

'Sti sigurazzion chi paghen la pupart di spese per i cure di sigurad, che però inn ciamad a pagà una part di cure in dò manere: cont una franchigia scernida del sigurad che la va de 300 a 2'500 CHF e cont un co-pagament del 10% fina a un massim de 700 CHF.

A nivell de organizzazzion politega el sistema l'è caraterizzad del federalism, che 'l po vesser limitad in di cas ecezzionai, compagn de 'n epidemia.

Sigurazzion Modifega

I sigurazzion inn di ent privad che però poden no havégh un profit di pian obligatori, che inn istess per tut el Pajes e poden no vesser refudad a quei che fann domanda, ma poden havéghel di pian suplementar, che poden revardà una mota de roba compagn di ogiai, del dentista o di cambere privade a l'ospedal e poden vesser refudad ai utent. El massim che vun el pò pagà senza un sussidi l'è del 8% del so redit, e poeu el Stat el ghe paga un sussidi. Anca i pussee pover ciapen, di Canton, di daner per pagàss la sigurazzion.

Tucc i necessità medegh, se inn no quatad de 'n oltra sigurazzion, inn pagad de 'sti sigurazzion e foeura di co-pagament sgiamò manzonad vun se l'è mandad in ospedal el paga domà i spese obergher.

Ent sanitari Modifega

I ent che dann i cure sanitarie in Isvizzera poden vesser publegh (de solit i ospedal i pussee grand), semi-privad (compagn di cà de cura) o privad (soratut i medegh de medesina general e i clineghe) e i svizzer gh'hann libertà de scernì in tra i vari medegh de la soa zona e gh'è no un medegh de bas de riferiment per i sigurad de 'n pont de vista formal, che poden catà foeura quell che favorissen, grazzia a un tarifari contratad ciamad Tarmed.

De solit i ospedal publegh inn finanziad sia di spese per i cure che di tasse, e donca poden fà pagà pussee ai forester e de solet i sigurazzion quaten no i intervent ordinari disponibil in del Canton se fad foeura del Canton e istess quaten no i clinegh privad, se la gh'è no una sigurazzion integrativa. A bon cunt, però, i citadin del Spazzi Economegh Europee poden fàss rimborsà del so sistema sanitari di cure fade in Isvizzera grazzia ai vari acord.

Proposte de reforma Modifega

Per via di volt cost del sistema in sui citadin gh'è stad di proposte de riforma del sistema: in del 2014 i citadin hann votad contra in d'un referendum per meter domà una cassa malad publega, con domà i canton francofon ch'hann votad a favor. In del 2020 el Canton Neuchâtel l'insubiss al Parlament federal de dàgh el permess ai Canton de organizzà di casse malad publeghe e i socialista in del midem ann consegnen una regoeulta di firme per fà un referendum per meter un limit massim del 10% del redit de un'economia domestega per la cassa malad.

Statisteghe Modifega

In del 2014 la Svizzera l'ha spendud el 11,4% del so PIL per la sanità, compagn de Franza o Germania, assee alt per la media de l'Europa ma manch di Stat Unid. Per l'OECD a l'è 'l Pajes con pussee infermer per persona e del 2018 l'Euro Health Consumer Index l'ha classifegad la sanità svizzera 'me la pussee bona d'Europa, dopo havé superad i Pajes Bass che de temp gh'haveven el primad, ma l'ha anca fad notà el so alt cost.

Premi medi Modifega

In del 2014 i premi medi per la sigurazzion al mes eren:

396,12 CHF per adult (pussee de 26 agn)
363,55 CHF per un sgiovin (19–25 agn)
91,52 CHF per un fioeul (age 0–18)

Riferiment Modifega

Alter proget Modifega

Wikimedia Commons el gh'ha dent imagin o alter archivi su Sistema sanitari de la Svizzera