Terdobbi

Quest articol chì l'è scrivuu in lombard, grafia milanesa.

Quella vos chi la gh'ha mìnga dì font o a hinn tròpp pocch. Per piesè, gionta di font a la vos.
Per avè on'ideja di alter vos senza font, vardee chichinscì.

El Terdobbi (localment [tar'dubi]; italian: Terdoppio) l'è on riaa piemontes e lombard.
A l'è longh 86 chilometer, e 'l sò percors l'è staa s'ceppaa in duu tocch: el primm, ciamaa noares, el ghe va dent al Tesin, intant che 'l segond (el lumellin) el ghe va dent al Pò. I duu tocch on temp eren taccaa insemma, ma in del Medioev el cors de quell noares l'è staa desviaa per portàggh l'aqua ai ronsg de la Bassa.

El percors

Noares

El Terdobbi el nass in di bricch del Noares, in tra i comun de Graa e Dumian. El scorr invers al sud, in parallel a la Gogna, a ovest de la vall del Tesin. El passa arent a Noara, al sò confin sud-est. Rivaa in tra Trecaa e Sozzagh, el scomincia a spartiss in vari brocch: vun el ghe va dent a la Ronsgia Scerana; on olter el va drizz fina a Sceran, e lì el finiss denter a la Ronsgia Mora. L'ultem tocch el va drizz fina a Cassoeu, e lì el finiss denter al Tesin.

Lumellin

El nass a Sozzagh de l'union de vari ronsg e risorgiv, cont el nomm de Fregg (prononzia local: [frøtʃ]). El riva in Lombardia aproeuv a Gravellona, e lì el cambia el nomm in Terdobbi. De lì el traversa tutt la Lumellina, e 'l ghe passa denter ai comun de Vigeven, Gambolò, Trumell, Garlasch, Dorn, Zinasch. Rivaa a Somm, el va a finì denter al Pò.

Curiosità

El Terdobbi el ghe da el nomm al comun noares de Terdobiaa, anca se al dì d'incoeu le traversa pu.