Turtel amar del Castel
|
|
Chest artícol a l'è scricc in Lumbàrt, ortograféa orientàl unificàda. |
El Turtèl amar del Castèl (Castel Goffredo) l'è 'n tipo de pàsta empinìda che se 'nsomèa al cazonsèl o al turtèl cremàsch e l'è 'n prodót agroalimentàr tradisiunàl de la Regiù de la Lombardia, tìpich apéna del teretóre del Castèl, en pruvìncia de Màntoa.[1]
L'è ciamàt isé per la prezènsa de la balsamita, 'n èrba aromàtica ciamàda apò a èrba amàra o èrba cazonsèla[2]. I óter ingredièncc pe l'empiöm i è: èrbe aromàtiche, formài de gràna, pà tridàt, öf, nus moscàda, ensàlvia, sìgola, ài e sal. Per preparà la pàsta frèsca se dòpra 'na resèta tradisiunàla con dés öf per ògna chìlo de farìna. La sfòia che se 'n càa la vé 'mpinìda co l'empiöm, piegàda per serà sö el bucunsì de 'mpiöm e rifinìda a mà. Se oté isé el turtèl che 'l g'ha 'na fùrma a triàngol schisàda caraterìstica.
'Na ólta cüzìcc en àiva salàda, i turtèi i vé servìcc condena spolveràda de formài de gràna e 'n cügià de botér deleguàt e 'nsaurìt co la 'nsàlvia.
Ogna an, la tèrsa setemàna de zögn, a Castel se organìza a "Festa del tortello amaro di Castel Goffredo" (Fèsta del turtèl amar del Castèl).
Riferimèncc Modifega
- ↑ Elenco dei prodotti agroalimentari tradizionali della regione Lombardia en formàt pdf, consültàt endèl zenér del 2013
- ↑ Giovan Battista Melchiori, "Vocabolario bresciano - italiano", 1817, [1]; scaricàbil per entréch ché: [2] (rist. anast. del Giornale di Brescia, 1985)
Bibliografìa Modifega
- Paolo Polettini, Luciana Corresini, "Il gioco dell'erba amara" - Viadana, 2004 - ISBN 978-88-87942-95-8