Utent:Sciking/Guida s'ceta per ministrador

Quest articol chì l'è scrivud in lombard, con la Noeuva Ortografia Lombarda

Donca, te see apena deventad ministrador de la Wikipedia lombarda o, magara, te see tornad dopo de 'na pausa e te gh'hee 'n quaj dubi? Preocupes no! Chinscì a gh'è una guida s'ceta che la te po ajutà.

Manutenzion de tucc i dì

Tucc i dì, magara pussee voeulte al dì, te gh'hee de controllà i Cambiament Recent. L'è assee important controllà soratut i modifeghe di utent noeuv e di adresse IP, che poden havégh di eror o di bordegament de l'enciclopedia. Se l'utent l'è in bona fed, l'è ben dàgh una man in la soa pagina de discussion, dopo de havégh dad el {{Benvegnud}} se ghe l'ha minga, menter se l'è dree a bordegà l'è ben avisàll cont el template {{Vandalganassa}} e poeu blocàll o, se l'è 'n bordegon assee cognossud, blocàll diretament. Al dì d'incoeu la Wikipedia lombarda la gh'ha anca i sysop globai, che despess invervegnen in di cas pussee importànt.

Besogna anca stàgh adree a la Categoria:De scancellà subit, che la gh'ha dent i pagine parpognude per vesser scancellade subit, che magara inn di bordegament o di reclam minga autorizad, anca se despess in di error, compagn di redirect fallad. L'è ben tegnì a ment che domà i ministrador poden scancellà di vos.

Tegnì neta la Wikipedia

Blocà quei che fann rebellot

Ogni tant un quajvun el vegn in su la Wikipedia domà per fà rebellot. In del cas, te podet blocàll, se te 'l feet, el sarà pu bon de scriver in su la Wikipedia per un period de temp scernid.

Podom partì i ruga-balle in trè categorie:

1. IP dinamegh: inn i pussee comun. Vann blocad domà per un dì, perchè poeu l'adressa la po cambià e 'l bloch el podaria tocà pussee utent
2. IP stategh: pussee rari, poden vesser blocad pussee a longh, vist che resten con l'utent fina a la fin del so contrat
3. Utent registrad, che poden vesser anca blocad per semper

Te gh'hee semper de valutà se e quant blocà: se vun l'ha apena registrad un cunt e 'l taca a scriver ingiurie o roba del gener te podet blocàll subit e per semper, ma se vun magara a l'è 'n utent poch espert che 'l toeu via di toch ai pagine per eror te podet jutàll, menter se vun a l'è 'n utent che 'l se inrabiss a la svelta e dopo varie modifeghe bone el da foeura de coo e 'l biastema in la pagina de 'n alter utent, te podet blocàll per un period de temp, in bas a quell che l'ha fad, ai so precedent e inscì via.

Domà se 'n utent el deventa propi gram per el desvilup de l'enciclopedia a l'è ben blocàll per semper. Ma, in general, per un bloch per semper gh'è de scoltà la comunità.

Blocà i pagine

Di voeulte, inveci, gh'è de blocà i pagine. Di esempi inn:

1. Una pagina l'è assee a vista, donca mudàlla el podaria dannegià l'enciclopedia (pensom domà ai robe in su la pagina principala)
2. Una pagina controversa, indova che gh'é di utent che risien per cossa meter dent (edit war)
3. Una vos che, per una quaj reson, a l'è bordegada despess

El bloch, in general, a l'è contrari al spirit de l'enciclopedia, che l'è libera per tucc, ma di voeulte l'è ben fàll per el bon fonzionà del sistema.

El bloch el po vesser fad in di confront:

1. De tucc i utent, foeura che per i ministrator
2. Domà di utent nò registrad o apena registrad

E 'l po vesser per semper o a temp.

El bloch per semper e per tucc a l'è l'extrema ratio per l'enciclopedia: de doperà domà, per esempi, per i pagine che fann su la pagina principala.

In general, i bloch per semper inn de schivà pussee che se po: l'è mej un bloch longh, ma che prima o poeu el finiss, che vun che 'l gh'ha no una fin.

Anca el bloch per tucc l'è de schivà pussee che se po: de solet, in di facc, inn i utent nò registrad a bordegà, donca l'è assee blocà lor. I utent registrad, al massim, fann un poo de rebellot perchè inn no tant boni, ma in del cas inn de jutà.

Gh'è semper de valutà con bon sens el durà del bloch: se a vesser bordegada a l'è la vos in su 'n sgiugador del folball che l'ha fad un gram eror, de solet, l'è assee un bloch per non registrad per 5 o 10 dì, menter per un politegh l'è pensabel anca un bloch de 6 mes o anca 1 ann, se gh'è stad sgiamò di bordegament.

El filter anti abus

El Filter Anti Abus a l'è un sistema automategh che 'l permet de marcà o blocà di modifeghe in bas a quell che gh'è dent, quei che i fann e inscì via. Mudài a l'è no inscì facil, vist che se doperen di espression informateghe, ma el sistema el gh'ha di jut.

Manutenzion periodega

Una voeulta a setimana

Una voeulta a setimana l'è ben guardà la pagina Wikipedia:Scancellazion, inscì de vidé se gh'è di pagine che la comunità l'ha domandad de scancellà. L'è anca ben guardà el Grot, per vidé se gh'è di noeuve, che sibien de la comunità o de la Fondazzion Wikimedia. A l'è ben guardàll anca pussee despess, ma 'na voeulta ogni setimana l'è el minim.

Besogna anca guardà la Vedrina, inscì de vidé se la comuniutà l'ha votad per meter o toeu via una pagina.

Una voeulta al mes

Una voeulta al mes gh'è de sistemà do robe:

1. Vedrina
2. Te 'l savevet che

Vedrina

Per savenn pussee, varda l'articol Wikipedia:Vedrina.

Ogni mes, in di prim dì, besogna sgiornà la vedrina cont i pagine che gh'è de meter per el mes e la spiegazzion l'è in la pagina. Se gh'è di pagine che manchen (i post in vedrina inn 7, magara per el mes ghe n'è 5 o 6) la scerna de la vos de tegnì l'è de l'admin che 'l fa el sgiornament, che 'l gh'ha de tegnì in cunt la longhezza, el temp, i argoment e inscì via.

Te 'l savevet che...

Per savenn pussee, varda l'articol Wikipedia:Te 'l savevet che.

Ogni mes (o anca ogni dò setimane, se gh'è tante vos) gh'è de cambià i vot pagine che inn in la rubrica "Te 'l savevet che...", de toeu de la lista che la gh'è. De solet, el foo a mità del mes, ma l'è no una regolla.

I robe de mudà inn i sotamodei de {{Savevet}}.

Quand che gh'è besogn

Di voeulte i pagine comunitarie, compagne del Grot, deventen propi longhe e l'è grama caregài, soratut per quei con di computer poch potent. In 'sto cas, a l'è ben archivià i discussion in d'una sota-pagina e fài partì ancamò de zero.

Riferiment

• Squasi ses agn de ministrazzion
• Regole e tradizzion de la Wikipedia