Covazzon
|
Quest articol chì l'è scrivud in lombard, con la Noeuva Ortografia Lombarda |
El covazzon, cognossud ancasì coma ‘trezza a la catalana’, l’è staita una manera de consciàss i cavii propri de mœuda intra i done de Italia e Spagna adree a l’ultem quart del segol XV.[1]
El covazzon l’era nò una trezza, ma un longh covanellot de cavii involtiad de di naster colorad, o nigher, infina a fosgià una cros sarandes in ponta. El vegneva pœu lassad indà sgiò dedree di spalle, e l’era asquas semper refenid cont una scufia tegnuda insema de un nastrin de seda – despess zornid con di sgeme o dei oltre preje prezziose – ligad intoren a la front.[1] I cavii eren spartid in dò bande de l’istessa mesura, e di vœulte un quaj zufin el vegneva a voltra e lassad insubì in sui ganasse, compagn de quell ch’es pœul vedé in di litrat de la Beatriz d’Est e de la Lisabeta Gonzaga.
A dà l’inviada a la mœuda del covazzon l'è stada la prenzipessa Sgiovanna de Trastamara, nobila spagnœula, che l'haveva tolt el rè de Napoli Ferrant d’Aragona in marid. Ancaben che l’havess fait sanmartin, la resgina la gh’è indaita adree a la manera de vestìss e consciàss del sò pajes infina a che l’è morta, e sovenz la sgent la voleva fà propri compagn de lee.[2] La consciadura l’ha tacad a spantegàss a Milan ind el 1489 con la rivadura de l’Isabella d’Aragona, mojer del Sgiovann Galeazz Sforza e biadega del rè Ferrant de Napoli. Impunemanch, el covazzon l'era minga vegnud una mœuda a Milan infina al mariozz del Lodovigh el Nigher con la Beatriz d’Est, sgermana de l’Isabella e ancamò vuna di biadeghe del rè Ferrant. De lì inanz, un bell poo de nobile milanese hann tacad a consciàss a la fœusgia catalana;[3] de facc, anca la Bianca Maria Sforza – mojer de l’imperador Massemilan I d’Asborgh e sorella del Sgiovann Galeazz – l’era usada a infrisàss i cavii ind un covazzon. De Milan el covazzon el s’è pœu spantegad ai oltre bande de la Lombardia, coma Parma, Modena, Sgenova e Remen, indova l’era portad de la Lisabeta Gonzaga e de la Violanta Bentevœuli.[4]
Galaria de imasgen
Modifega-
La Beatriz d’Est ind la Pala Sforzesca (1494 zirca) -
Pinturicchio, 1502-07 zirca, el covazzon de la Leonora del Portogall -
La Violanta Bentevœuli ind la Pala de San Vinzenz Ferrer (1493-1496) -
-
-
La Bella prenzipessa di Leonardo da Vinci, forsi un litrat de la Bianca Maria Sforza -
-
Bust de la Beatriz d’Est, Giovanni Cristoforo Romano, 1490 zirca. -
Di covazzon milanes vedud de dedree, scena de l’investidura ducal del Lodovigh el Nigher del Messale Arcimboldi ind la Bibliotega capitolara del Dom de Milan. -
Medaja de la Lucrezzia Borsgia cont el covazzon.
Referenze
Modifega- ↑ 1,0 1,1 Milano rivista mensile del Comune, Stucchi Ceretti, p. 31.
- ↑ Michele Vecchioni, Notizie di Eleonora e di Beatrice di Aragona, figlie di Ferdinando I, re di Napoli, maritate dal real genitore, con Ercole I, duca di Ferrara e di Modena, con Mattia Corvino, re di Ungheria, 1791.
- ↑ Francesco Malaguzzi Valeri, La corte di Lodovico il Moro, la vita privata e l'arte a Milano nella seconda metà del quattrocento.
- ↑ I soperchi ornamenti copricapi e acconciature femminili nell'Italia del Quattrocento Di Elisabetta Gnignera · 2010, 173.