Luca Mangoni
Luca Mangoni o anca domà Mangoni (Milan, 26 de marz 1961) l'è on architett e on omm de spetacol italian.
L'è cognossuu soratutt perchè l'è on member ad honorem del grupp milanes Elio e le Storie Tese. Tra l'alter, insemma a Elio, Rocco Tanica, Cesareo, Faso e Linus el conduss Cordialmente, storegh programma de Radio DJ.
La presenza de Mangoni in del grupp a l'è particolar, già che 'l sa minga sonà e gnanca cantà (anzi, tutt el contrari): ma i sò aparizion hinn fondamentai per i concert, indove 'l vegn foeura duranta i canzon con milla travestiment diferent e 'l tacca a ballà. Vun di sò personagg pussee cognossuu l'è Supergiovane, interpretaa duranta la canzon con l'istess nomm.
In del 2010 el s'è candidaa con Refondazion Comunista al consili regional de la Lombardia; l'ann dopo inveci el s'è candidaa al consili comunal con la lista de la Milly Moratti e 'l gh'ha 'vuu 1068 preferenz. In nissun di duu cas, però, l'è riessii a vess eleggiuu.
