Referendum consultiv del 2017 in Lombardia

Quest articol chì l'è scrivuu in lombard, grafia milanesa.

El 22 de ottober del 2017 gh'è staa in Lombardia on referendum consultiv in su la vertura di trattativ cont el governo italian per avègh pussee formi de autonomia, come previst de l'articol 116 de la Costituzion. El referendum, previst de l'articol 52 del Statut Regional, l'è staa faa cont la votazion elettronega.

Storia

El referendum a l'è staa deciduu del Consili Regional cont delibera 17 febrar 2015, n. 638, poeu seguida de la legg regionala n. 3 del 23 febrar 2015, voruda del Movimento 5 Stelle, che l'ha autorizzaa el vot elettronich in di consultazion regionai.

El 29 de magg del 2017 a Cremona, per la Festa de la Lombardia, el Roberto Maroni l'ha firmaa el decrett de indizion offizial. El dì, concordaa cont el president del Veneto Luca Zaia, l'era giamò staa nonziaa a Berghem el 21 de april.

El 13 de giugn el Consili Regional l'ha approvaa 'na mozion in sul defàss se 'l vinc el sì.

Modalità del votà

Per la prima voeulta in Italia se votarà in manera elettronica. El sistema, progettaa de l'azienda olandesa SmartMatic, el preved el doperà di tablet per votà che hinn attivaa del President del Segg cont on interruttor dopo de 'vègh verificaa l'identità de l'elettor e, per privacy, el registra no l'ora esatta del vot per impedì de savè cossa che l'ha votaa on elettor.

I tablet, 24000, sarann lassaa in comodaa d'us ai scoeul, cont on investiment de 23 milion de Euro.

Per sicurezza in circa el numer de segg che corresponden al 5% di elettor ghe sarà la stampa del vot in su la carta, recolt automaticament in d'on urna e poeu scutaa a man per verificà la corrispondenza cont el vot elettronich.

Per votà la sarà minga doperada la tessera elettorala.

Posizion di Partii

La pupart di partii la s'è s'cerada cont el sì. In la maggioranza, la Liga Nord e Forza Italia supporten el sì, anca Fratelli d'Italia - Alleanza Nazionale l'è per el sì, e l'ha auspicaa che la Lombardia la devegna ona Region a Statut Special, anca se la leader nazionala Giorgia Meloni l'ha parlaa contra del referendum.

In l'opposizion, el Moviment 5 Stell l'è per el sì, e l'ha parpognuu la domanda offiziala, in contrast a quella de la Liga che la domandava el Statut Special.

El Partito Democratico a l'è pussee spartii: La pupart di Democratich la considera el referendum inutil, ma la part ligada al Giorgio Gori a l'è per el sì, inveci i part ligaa a di alter personagg a hinn pussee per l'astension.

Foeura del Consili

In tra i Partii foeura del Consili Regional s'hinn s'ceraa differentement.

Pro Lombardia e la sezion lombarda de Fare! hinn per el sì.

Sinistra Italiana l'ha supportaa sia l'astension che el no, inveci el Partii de la Refondazion Comunista l'è per el no.

El Moviment Nazional per la Sovranità a l'è per el sì.

Resultaa

I elettor ciamaa a votà in Lombardia hinn staa 7 897 056, dividii in 9 224 sezion elettoral de 1 523 comun.

I segg elettorai hinn dervii dai ore 7:00 a i 23:00 indela sola giornada de dominega 22 ottober 2017.

Affluenza

Affluenza	ore 12:00	ore 19:00	ore 23:00
Lombardia	11,09%	31,70%	38,26%
Berghem	14,87%	39,75%	47,37%
Bressa	12,83%	36,87%	44,14%
Com	11,84%	34,69%	41,64%
Cremona	11,98%	33,35%	39,90%
Lec	13,75%	37,50%	44,78%
Lod	11,93%	32,53	39,39%
Mantoa	10,80%	29,64%	35,87%
Milan	8,64%	25,78%	31,23%
Monça e Brianza	10,92%	32,73%	39,52%
Pavia	10,23%	27,71%	33,55%
Sondri	11,72%	34,41%	42,31%
Vares	11,14%	33,03%	39,47%

Vot

Opzion de vot		Vot	%
RISPOSTA AFFERMATIVA	Sì	2 869 797	95,29%
RISPOSTA NEGATIVA	No	118 668	3,94%
SCHEDA BIANCA		23 165	0,77%
Total		3 011 395	100%

Resultaa del vot per Provincia o Città Metropolitana

Provincia	Sì	No	Scheda Bianca
Berghem	96,30%	3,00%	0,70%
Bressa	96,53%	2,84%	0,63%
Com	95,61%	3,60%	0,79%
Cremona	95,61%	3,56%	0,83%
Lec	95,85%	3,41%	0,73%
Lod	95,26%	3,96%	0,78%
Mantoa	95,21%	4,03%	0,76%
Milan	93,67%	5,47%	0,86%
Monça e Brianza	95,22%	4,01%	0,77%
Pavia	94,83%	4,24%	0,92%
Sondri	97,56%	1,84%	0,60%
Vares	95,55%	3,69%	0,76%