Wikipedia

Renassiment

moviment cultural e artistegh
bussola Disambiguazión – Se te see dree a cercà dei olter signifegad, varda Renassiment (disambiguazión).
Lombard Quest articol chì l'è scrivud in lombard, con la Noeuva Ortografia Lombarda

El Renassiment a l’è stad un moviment cultural e artistegh ocors adree ai segoi quii di 15 e 16.[1] Coma period istoregh, el marca el passasg de l’Etaa de Mez a quella Moderna e l’era caratarizad de l’intenzion de fà tornà a voltra e soprà in grandœur i suzzess e i ideje de l’Antighitaa classega. Sozziad con di belle mudanze sozziai in tancc camp e dissipline – compagn de l’art, architecciura, politega, literadura, splorazzion e zienza – el Renassiment al prenzipi l’è inviad fœura ind la Republega de Fiorenza e el s’è pœu spantegad in Lombardia e part de l’Italia, ma anca in tuta Europa. El termen rinascita (renassiment) dovrad per insegnà quell period istoregh chì el compariss per la prima vœulta ind el 1550 in Le vite de’ più eccellenti pittori, scultori e architettori del Giorgio Vasari.[2]

La Madona del liber, picciura del Sandro Botticelli

I fondazzion intelletuai del Renassiment eren impientade ind l’umanesim, vegnud sgiò di conzet de l’humanitas romana e de la redescoverta de la filosofia grega classega. Coma moviment cultural, el Renassiment l’ha vedud la fiorida del latin literari e debon una s’ciopada de la literadura ind i lengove volgare, scomenzada de l’imprendiment di classegh latin e gregh, e trebuida al Petrarca di sò contemporani. L’ha pœu anca vedud un badaluch de reforme e contrebuzzion a l’art de di personasg compagn del Leonardo da Vinci e Michelangelo Buonarroti, ch’hann inspirad el termen ‘sgeni renassimental’, o polimata.[3][4] In politega, el Renassiment l’ha contrebuid al desvilup de di costum e convenzion quò a la diplomazzia, e ind la zienza a havégh una fiduzzia pussee slargada di metod de osservazzion e induzzion. De sora maross, el period l’ha vedud l’introduzzion del moderen sistema bancari.[5]

Panoramega

Modifega

El Renassiment el pœul vesser vedud coma el tentativ de dei intelletuai de studià e mejorà la sò realtaa del temp intravers una revalutazzion dei ideje de l’Antighitaa, binandej pœu anca a dei aprocc nœuv al penser e a tuscoss in sgeneral. Per un quaj filosef compagn de l’Hans Kohn, quest’epoca chì la ven descrivuda coma un period indova che ‘i homen se vardaven in sgir per di fondazzion nœuve’; de facc, un quajvun d’olter coma l’Erasem de Rotterdam e el Thomas More se imasgenaven propri un mond con di nœuve fondazzion spirituai.[6]

El period renassimental l’iscomenza adree a la crisi del 1300 e convenzionalment el feniss con la spirada de l’umanesim ind el 1600, e ind l’art con la rivadura del Baroch. L’iscomenzè a Fiorenza,[7] e a gh’è tante teorie intuitù del perchè el saga partid fœura propri de chichinscì: ghe ven tirad a man la strucciura politega del territori, i fameje pussee prominente de denter del panorama sozzial fiorentin, i Medici[8] e la migrazzion di studios gregh in Italia adree a la Toma de Constantinopel.[9][10][11] Dei olter zenter pussee grand fudenn Venezzia, Sgenova, Milan, Roma e Napoli.

Carataristeghe

Modifega

Filosofia e umanesim

Modifega
 
La scœula de Atena del Raffaello Sanzio (1511)

L’umanesim l’era el valor pussee coltivad ind el Renassiment, impientandes ind i conzet che se orisgenaven ind l’Antighitaa classega. Per el Lorenzo Casini, ‘vuna di fondazzion del moviment renassimental l’è staita l’ideja che l’esempi de l’Antighitaa classega el constituiva un modell inestimabel de zellenza al qual i temp moderen – inscì decadent e indegn – podeven fàgh a referiment per sgiustà i dagn trait adree de la Toma de l’Imperi Roman’. L’ideja l’era ancasì che Dia l’havess dait al mond nomà una Veritaa – quella cristiana – ancaben che di tochelit sœu de questa chì podessen trovàss anca ind dei oltre culture, intra i quai ghe figurava quella greco-romana. Per quest, tut zò ch’el vegneva de l’Antighitaa in termen de bibliografia e oltre reliquie compagne l’era tegnud in volta considerazzion.[12] L’umanesim renassimental l’era però minga una filosofia, ma un metod de imprendiment. De facc, i umanista studiaven i test antigh in lengova orisgenal e la sò instruzzion la toveva denter l’istudi de zinch materie umanisteghe in partigolar: poesia, gramatega, storia, filosofia moral e retorega. L’umanesim l’era donca un moviment per redescovrì, interpretà e sorbì i lengove, literadura, cognossenza e valor de l’antigh mond greco-roman.[13] De facc, a l’incontrari de quell ch’a suzzedeva ind el Volt Medioev indova i studios se fogalizaven asquas del tut sora l’istudi dei œuvre greghe e arebe de zienza natural, filosofia e matematega, i cademegh renassimentai eren pussee interessad a studià i test gregh e latin intuitù de la literadura, storia e oratoria. Quell fenomen chì l’è scomenzad cont el Petrarca e dei oltre figure compagne de lu, ch’inn indaite a ravanà ind i biblioteghe europeje per rebuscà i lavorà dei autor latin pussee famos, quai el Zizzeron, el Lucrezzi, el Livi e el Senega.[14]

I filosef politegh – compagn del Niccolò Machiavelli – zircaven de descriver la vida politega coma l’era, o ben voleven fàlla capì a la sgent intravers la reson. De sora maross, gh’è stait un interess renovad per la filosofia neoplatonega, che el s’è trait adree una grossa passion per la bellezza. L’amor per la bellezza e per l’armonia del cosem l’ha menad, de facc, a la produzzion de un frach de œuvre d’art. Impunemanch, el Renassiment l’è mai riessid a vesser un’imitazzion completa de la cultura antiga, desgià che l’è stait miss in opra ind una sozzietaa catolega, che la gh’haveva di valor assee difarent de quii de l’Europa pagana. Donca, el Renassiment l’è stait ancasì un tentativ orisgenal de armonizà el neoplatonisem pagan con la religion cristiana, insema a dei influenze orientai, ebraeghe e arebe, indova l’istudi de la magia e de la strologia l’era important fiss.[15][16][17]

Art

Modifega
 
Basilega palladiana a Visenza
 
Primavera del Sandro Botticelli (z. 1482)
 
Amor sagrad e Amor profan del Tizzian (z. 1514)

Vuna di carataristeghe del Renassiment l’è staita propri la granda produzzion de di strasordenarie œuvre d’art. Dei artista compagn del Giotto, Filippo Brunelleschi e Leon Battista Alberti inn stait tucc creditad con la descoverta de di nœuve tecneghe artisteghe ind i sò mester respetiv.[18] I piccior hann desvilupad dei oltre tecneghe con l’istudià la lus, l’ombria e la notomia umana, spezzialment ind el cas del Leonardo da Vinci. Tut quest l’insubiva el desideri de depensger la bellezza de la natura e despoltià i assioma de l’estetega, compagn de quell ch’es pœul vedé di lavorà del Michelangelo Buonarroti e del Raffaello Sanzio.[19] Dei olter artista sossenn important inn el Sandro Botticelli e el Tizzian.

Gh’è stait almanch trii element prenzipai del nœuv istil renassimental:

  1. La formulazzion di regole de prospetiva liniara zentrega, che l’organizava l’ispazzi in manera unitaria;
  2. L’atenzion a l’hom coma individov, e ind la fisionomia e notomia, e ind la representazzion di sò emozzion;
  3. El renegà i element ornamentai per tornà indree a l’essenzialitaa.

L’art renassimental l’ha vedud l’istudi e la redescoverta di modei antigh, e in architecciura, e in scultura. Ghe ven redescovrid e redoperad dei element de l’architecciura e art classega, compagn de l’organizazzion armonega di volum, di spazzi e de la lus de denter de l’edifizzi. L’architecciura la deventa donca armonia, proporzion e simetria. In partigolar, a vardà al desvilup de l’architecciura, es pœul vedé che el passasg di forme construtive medievai a quelle renassimentai l’è minga suzzedud ind una manera neta, ma l’è sozziad a varie dozzion e continuitaa. Ind el segol XVI l’istil classegh-antigh de l’Andreja Palladi – impientad ind i studi del Vitruvi – el s’è spantegad minga domà in Lombardia e Italia, ma ancasì in Inghilterra e ind l’Amerega setentrional. I sò œuvre hann produt un conzet estetegh de bas e un istil d’architecciura partigolarment eficazz ind la construzzion de di ville de campagna. A difarenza di palazz urban di scior, de facc, la posizzion de l’edifizzi l’era nò inscì importanta, ma quell ch’a cuntava l’era el conligament intra i comoditaa de la vida de campagna e i fonzion economeghe de una massaria.[20] L’efet persistent de l’istil del Palladi el s’è refletud anca ind i termen sozziad cont el sò nom, compagn de ‘palladianisem’ e ‘motiv palladian’. I sit prenzipai indova el Palladi l’era ativ eren Visenza e Venezzia, e l’era riessid a sozzià la fazzada di tempi antigh ai edifizzi sagrad del Renassiment, un proget che nissun l’era mai riessid a fà inanz de lu.[21]

Intuitù de la picciura, l’è stait important l’usasg de la lus e del color. El color l’haveva retegnud – ancamò ind el segol XVI – un rœul sovenz simbolegh e fonzional, ligad al sò valum intrinsegh; per esempi, i figure de una scena religiosa vegneven realizade cont una zerta quantitaa de ross, or e blœu, tucc di materiai car bis’gios che gh’haveven la fonzion de representà un’oferta a Dia. A partì del segol XV, però, gh’era sgiamò un usasg pussee liber del color. El Leon Battista Alberti ind el sò De pictura (1435–1436) l’ha ciarid fœura i termen de la quistion, cont el fà notà a che fœusgia el color el gh’haiva minga de valum intrinsegh del sò, ma el dependa inanz de tut de l’inluminazzion. Un lavor che l’era vegnud propri carataristegh de quell temp chì l’è stait, tutamanch, el tentativ de includer e representà ind l’art la realtaa quotidiana e i condizzion naturai de la sgent: i event de la vida de tucc i dì, i persone ind i sò azzion e ind la sò naturalitaa, ma anca i event politegh inn stait semper pussee dovrad coma representazzion.[22] Però, i nœuv obietiv de la picciura renassimental, la vesinanza a la natura e la representazzion de la realtaa, rogaven di mez nœuv. Un’oggiada a una stanza depencia o a un paisasg la rogava un efet de profonditaa spazzial: i robe in prim pian de la picciura gh’haveven de vesser misse sgiò ind un contest pussee sberlusent e visivament relevant de quelle dedree in su l’isfond.[22] La profonditaa spazzial la vegneva perzò faita su geometregament con precision dovrand i mez de la prospetiva zentral, idest un sistema de linie de fuga; a quest es sgiontava i mez de la prospetiva aeria e del color. L’usasg de la prospetiva zentral l’ha permetud de crejà l’inlusion de un ispazzi tridimensional in su una superficia bidimensional. Depos che i conquiste de la prospetiva inn deventade un istrument comun, s’è passad a una prospetiva pussee d’aira e lus, intanta ch’es zircava de cacciurà e reprodù pussee profondament i stacc mentai di persone e di figure per fàgh adree di litrat.[23] Ind la picciura renassimental – che l’era adree a emanzipàss semper pussee dei orientament di forme de representazzion medievai – gh’è stait recognossud ancasì grandezza e dignitaa interiora: ‘L’espression individual de la persona depensgiuda la deventa indespensabila per la naturalezza de la representazzion’.[22]

Asca la Gesa coma conmitenta pussee importanta de œuvre d’art, ind el Renassiment gh’è stait semper pussee scior laegh e representant de di corporazzion di mester a conmissionà i lavorà dei artista. Tut quest l’ha menad a un islargament di tema de la picciura, soratut perchè i motivazzion di conmitent toveven denter minga nomà la pietaa cristiana, ma anca el piasé e el prestisg. In sgionta ai prenzep, gh’era interessad a l’art anca i nobii logai, i clesiastegh pussee important, mercant, bancher e i artista medem.[24]

Tejater

Modifega
 
El Tejater a l’antiga a Sabioneda

El Renassiment l’è stait l’Etaa dora del tejater in bona part de l’Europa. La redescoverta di classegh gregh e latin l’ha menad a un ispantegament di spetagoi teatrai che, progressivament, hann passad fœura in numer i representazzion a tema religios. Es podariss dì, donca, che el tejater l’era vegnud pussee laegh. La redescoverta de l’inscì-ciamada ‘comedia a l’antiga’ l’è ocorsa a Ferrara, grazzia a l’interess del duca Ercol I d’Est, che l’haveva sgiamò parmovud di spetagoi in lengova volgara de dei autor latin.[25] Desgià che i fiœui de l’Ercol d’Est s’eren tucc maridad ind di fameje importante de la Lombardia, el tejater ferrares el s’è pœu spantegad ind la pupart di cort lombarde.[25] Grazzia a la Beatriz d’Est, el Lodovigh el Nigher l’ha fait fà su el prim tejater a Milan, apœus che l’haveva vedud una representazzion a Ferrara.[26]

I sgender desvilupad e parposud inn stait la comedia, tragedia, el drama pastoral e – de lì adree – el melodrama, che gh’hann havud tucc una bella influenza in sul tejater europee del temp. Gh’è indait anca inanz la tradizzion medieval de la representazzion sagrada, che la gh’ha havud tancc esponent anca adree al Renassiment.

Musega

Modifega
 
El conzert del Gerard van Honthorst (1623)

La musega l’ha vedud la scœula franco-fiamenga coma vun di sò protagonista. L’invenzion de la stampa l’ha permetud de compartì la musega a un numer pussee grand de persone. Soratut ind i ambient colt e scior, gh’è cressud la domanda per la musega e l’intrategniment in sgeneral. La musega la s’è de maneman sliberada di ligam medievai che la gh’haveva, e gh’è stait permiss pussee varietaa in ritem, armonia e forma. Ind el Renassiment, la musega l’è vegnuda un veigol d’espression personal, cont i composidor che trovaven di nœuve manere per dàgh pussee espression a la musega vogal. La musega segolara l’ha tacad a sorbì i tecneghe de la musega sagrada, e vizzeversa. Dessorapù, di forme popolare compagne del madregal s’inn pœu spantegade in tuta Europa.

A partì dei agn ’70 del 1500 gh’è stait un quaj tentativ – per esempi del fiorentin Girolamo Mei e del franzes Jean-Antoine de Baïf – de fà tornà a voltra la musega de la Grezzia antiga. Coma resultad de la sò rebusca in sui font, el Mei l’ha descreit i difarenze intra i vari stii gregh. Lu e dei olter hann pœu critegad la musega polifonega cont el sostegnì l’omofonia sota el nom de ‘cant ferem’.[27]

I carataristeghe de stil de la musega renassimental tœuven denter:

  1. La musega intenduda coma un’œuvra di composidor. La ven dovrada per intrategnì e minga nomà per lodà Dia. Gh’è tanta polifonia ind la musega sagrada e ind i melodie di canzon pussee popolare tratade ind una manera omofonega ind l’aria segolara.
  2. Di fameje intreghe produsen di strument, compagn di violin, flute, viœule e vari strument a fiad e legut. Respet a la musega de l’Etaa de Mez ghe muda la perzezzion de l’armonia.
  3. Carataristegh de la musega del Renassiment l’è l’isforz a crejà un’unitaa armonega intra i deverse strucciure polifoneghe e acordai, ma anca intra polifonia e comprensibilitaa del test.[28]
  4. El pont de la massema realizazzion musegal dei ideje renassimentai l’è stait la creazzion de l’opara intoren al 1600. El Jacopo Peri l’ha composud el drama musegal Euridiz, presentad per la prima vœulta ind el 1600. El Claudio Monteverdi l’ha composud i opare Orfee (1697) e Arianna (1608).[27]

Zienza

Modifega
 
Stronem Copernegh, o conversazzion con Dia del Jan Matejko (1872)

La redescoverta di test antigh e l’invenzion de la stampa zircumzirca ind el 1440 haveven democratizad l’imprendiment e consentiven ai informazzion de spantegàss pussee a la svelta. La zienza la se messedava a l’art indova di personasg compagn del Leonardo da Vinci faseven di dissegn cont a tema la notomia e la natura. Dei olter desvilup important inn stait ind el prozzess de descoverta, o ben el metod zientifegh ch’el se fogalizava sora l’evidenza empirega e l’importanza de la matematega.[29] El nœuv metod zientifegh l’ha menad a di gross progress ind i camp de la stronomia, fisega, biologia e notomia.[30]

Depos Nicolaa Copernegh e Tycho Brahe, el Sgiovann Chepler el s’è demonstrad a la fenitiva un pensador revoluzzionari e un sgeni matemategh ind la teoria e rebusca stronomega adree al Renassiment. Quell che l’è stait propri bestial l’è stait el sò determenà la regolaritaa del percors di pianeta intoren al sol, a scomenzà con Mart. A stà a quell che l’ha deit el Chepler medem, i calcoi che l’hann menad a comprender la forma ellitega de l’orbeda de Mart inn stait complegad fiss fiss.[31] El Renassiment platonegh ind la segonda metaa del segol XV l’ha contrebuid al nassiment di studi matemategh e de l’afermazzion zientifega de la matematega, desgià che la tradizzion platonico-pitagorega l’era impientada ind l’‘organizazzion del cosem segonda mesura e numer’ e che ‘l’insubiss la divinitaa de denter de lu, ind la sò regolaritaa e ind la sò bellezza. Dia, quell che l’ha fait su el mond, el s’è voltad ind un matemategh’.[31]

La fisega de l’Archimed, a sò vœulta, l’è staita de un’importanza zentral ind i rebusche del Galileo Galilei, che, segonda Roeck, l’ha miss insema i capazzitaa de un brillant matemategh e osservador con quelle de un dovrador prategh: el Galileo l’ha otemizad, intra i oltre robe, el telescopi per i sò studi, che l’ha menad a di famose osservazion stronomeghe e ai conclusion eliozentreghe.[31]

Splorazzion

Modifega
 
La rivadura del Cristofen Colomb (1847)

Duranta el Renassiment – intra el 1450 e el 1650[32] – i Europee hann visitad e metud sgiò ind di mape tucc i continent, condemanch l’Antartid. Ind el 1492, el Cristofen Colomb l’ha intraversad l’Ozzeen Atlantegh per trovà una rota che le menass in India. Per error, l’è rivad in Amerega, ancaben ch’el credess de vesser rivad ind i Indie. Ind el 1606, el navigador olandes Willem Janszoon l’è partid dei Indie cont un barcon e l’è rivad in Australia. Depos, gh’è indait adree tancc olter splorador ch’hann pœu mapad tut el continent.

Religion

Modifega

I nœuv ideai umanistegh se traven adree dei aspet pussee segolar, che s’inn desvilupad ind un contest marcatament cristian. La pupart dei œuvre d’art eren o conmissionade diretament de la Gesa catolega, o dedegade a lee.[33] Ind el volé fà tornà a voltra i ideai del neoplatonisem, i umanista renassimentai hann però minga renegad el cristianesim, ma, a l’incontrari, gh’hann dedegad tante œuvre e tratad. El Renassiment el gh’ha havud un efet profond in su la teologia contemporania, soratut ind la manera che la sgent la perzepiva la relazzion intra Dia e l’hom.[33] Tancc di teolegh renassimentai ghe indaven adree al metod umanista, coma, per esempi, l’Erasem de Rotterdam, el Thomas More, el Martin Luter e el Sgiovann Calvin.

El Renassiment l’è stait un period de rebellot religios, in partigolar cont el scisma intra la Gesa catolega e quella protestanta, indova che trii homen se deciaraven papa a l’istess temp.[34] La Gesa l’era corrota ind i sò costum, coma testimoniad del comportament del papa Lissander VI che l’haveva razzad di fiœui bastard intanta che l’era ancamò un cardenal.[35]

Spantegament

Modifega

Renassiment ind la Lombardia storega

Modifega
  Per savenn pussee, varda l'articol Renassiment lombard.
 
La Vener indormenta del Sgiorsgion
 
La Zertosa de Pavia
 
La vœulta de la Sala di Sgigant ind el Palazz Tè a Mantova

El Renassiment el gh’ha havud un rœul propri important ind la Lombardia storega. Ind el Ducad de Milan, gh’è stait el passasg de podé di Vescont ai Sforza invers la metaa del segol XV, ch’el coinzideva con la transizzion del gotegh a l’umanesim.[36] Ind el cors del segol XV, la scena artistega milanesa l’era adree a desvilupàss senza problema, e l’ha sorbid dei influenze importante di stii padovan, fiorentin e ferrares. Con la rivadura del Bramant e del Leonardo da Vinci, Milan l’è rivad al massem splendor artistegh ind el panorama europee. Un gran patron d’artista l’è stait el Franzesch Sforza, che ghe piaseva propri tanta l’istil sontuos che gh’haveven i Vescont. L’ha donca fait lavorà tancc artista ch’eren sgiamò ativ a Milan sota ai Vescont, compagn del Bonifazzi Bemb.[37] Per consolidà el sò podé, el Franzesch l’ha subet tacad a fà reconstruì el Castell Sforzesch, la veggia residenza milanesa di Vescont. Impunemanch, l’impresa pussee granda l’è staita el Dom, ancaben ch’el ghe indass adree ancamò ai tradizzion goteghe e romaneghe.[37] In sgionta, l’ha fait fà su anca la Zertosa de Pavia.[38]

Anca Mantova, sota al domini de Cà Gonzaga, l’è staita un important zenter renassimental. Sgiamò ai temp del Lodovigh el Turch, con la rivadura a Mantova del Leon Battista Alberti e de l’Andreja Mantegna, la zitaa l’haveva mudad i sò fatezze. Al temp de l’Isabella d’Est, la cort mantovana l’era vuna di pussee refinade de tuta la Lombardia storega, indova el Mantegna el provava a fà tornà a voltra el grandœur de l’Imperi Roman e la marchesa la conlezzionava i œuvre del Leonardo da Vinci, Michelangelo, Perugino, Tizzian, Lorenz Costa e el Corresg. L’amor dei art de la marchesa l’è stait pœu passad sgiò a sò fiœul, el Fedarigh II Gonzaga, anca lu gran patron d’art. Sota a lu, el Giulio Romano, inlev del Raffaello Sanzio, l’ha fait su el Palazz Tè indova l’ha depenc la Sala di Sgigant.[39]

A Venezzia, invezzi, l’influenza che la gh’ha havud la sò art l’è indaita ben de de là del Renassiment, cont el retegnì la sò prominenza ind el panorama europee infina al segol XIX.[40] Ancaben che el podé e el prestisg de la Serenissema i fudessen sgiamò in declin, Venezzia la restava la zitaa pussee sciora, popolada e gajarda de la Lombardia.[41] La controllava ancasì devers territori de terraferma, ch’hann pœu contrebuid a la scœula venezziana, compagn de Padova, Bressa e Verona. Sota al domini venezzian gh’era anca l’Istria e la Dalmazzia, che gh’hann dait del sò. A ben vardà, la pupart di piccior e architeccior venezzian del segol XVI l’era nassuda in zitaa nomà de rara,[41] e un quajvun el lavorava soratut ind i olter territori de la Republega. La picciura venezziana l’ha fait cognosser indepertut di grand artista de spertisia e talent, compagn del Sgiorsgion, Tizzian, Tencioret e el Palma el Vegg. La scœula venezziana l’ha eserzid una grossa influenza sora el desvilup de tuta la picciura ozzidental.[42]

Relevant l’è stait anca el Renassiment a Bergom e Bressa, ch’hann vedud una fiorida di sò art sota a la ruzada di piccior venezzian e milanes. In partigolar, chichinscì ghe figurava dei artista compagn del Vinzenz Fopa, Gaudenzi Ferrer e Lorenz Lot. A Bressa, di piccior coma el Romanin, el Moret e el Savold hann messedad i devers stii lombard – soratut milanes e venezzian – cont el gadegnà di resultad de granda orisginalitaa de denter del panorma artistegh de la Lombardia.[43]

Renassiment a Fiorenza

Modifega

Ind i ultem desenni del segol XIV e i prim de quell di XV, Fiorenza l’ha vedud una fiorida de l’economia, cont un quaj suzzess militar e politegh. Grazzia a di literad compagn del Petrarca, gh’è stait popolarizad l’interess per i orisgen romane, instora asquas del tut desmentegade. Intuitù dei art visive, dei artista compagn del Filippo Brunelleschi, Masaccio e Donadell hann mudad, respetivament, i lenguasg de l’architecciura, picciura e scultura.[43] Zò l’indeciava donca una mudanza minga nomà di temp, ma ancasì de la mentalitaa de la sgent.[43]

Renassiment in Europa

Modifega

El Renassiment in Europa l’ha ciapad pè adasi adasi ind el cors di segoi XV e XVI. Un moviment de renovazzion independent de quell che gh’era dree a suzzeder in Lombardia e Toscana l’è vegnud su indeperlù ind i Fiandre a l’inizzi del segol XV.

Invers la fenitiva del segol XV, la fama dei artista lombard e toscan l’haveva oramai passad fœura i siront dei Alp, desgià che tante cort europeje voleven anca lore dàgh de lavorà. Grazzia a l’interess di prenzep e di scior, la presenza de quist artista a cort l’è vegnuda semper pussee consistenta, cont el formàss de di scœule logai in sul modell tosco-lombard. L’è el cas, per esempi, del Franzesch I de Franza che l’haveva ospedad a la sò cort dei artista compagn del Leonardo da Vinci, Rosso Fiorentino, Francesco Primaticcio e Benvenuto Cellini. Dei oltre vœulte, inn stait i artista forest medem a fà sanmartin in Lombardia per imprender i secret de l’art lombarda. L’artista todesch Albrecht Dürer – che l’era indait a Venezzia per dò vœulte (1494–1495 e 1506–1507) – el s’è incorsgiud de la difarenza in istacc sozzial che i artista e i artesan gh’haveven lilinscì respet a Norimberga, zitaa indova l’era nassud.

Adree al segol XVI, l’era ciar e patent che tuta l’Europa l’indava sgiò de coo per l’istil renassimental tosco-lombard, che l’era deventad el modell de indàgh adree per tucc i artista del continent. Gh’era nassud indepertut, de facc, di scœule renassimentai nœuve de carater extra-lombard, compagne de la scœula franzesa, todesca, spagnœula, inglesa, fiamenga e olandesa.

Refarenze

Modifega
  1. ↑ «I suoi limiti cronologici possono fissarsi con buona approssimazione tra la metà circa del Trecento e la fine del Cinquecento, anche se alcuni studiosi tendono a circoscrivere l’arco cronologico tra il 1450 e il 1575, altri tra il 1492 e il 1600.» cfr. Enciclopedia Italiana Treccani.
  2. ↑ (2006) The Renaissance: a very short introduction, 1. publ, Oxford: Oxford Univ. Press, 9. ISBN 978-0-19-280163-0. 
  3. ↑ BBC Science and Nature, Leonardo da Vinci Retrieved 12 May 2007
  4. ↑ BBC History, Michelangelo Retrieved 12 May 2007
  5. ↑ Diwan, Jaswith. Accounting Concepts & Theories. London: Morre, 1–2. id# 94452. 
  6. ↑ (1944) The Idea of Nationalism: A Study in Its Origins and Background. New York: Macmillan. 
  7. ↑ Burke, P., The European Renaissance: Centre and Peripheries 1998
  8. ↑ Strathern, Paul The Medici: Godfathers of the Renaissance (2003)
  9. ↑ Encyclopædia Britannica, "Renaissance", 2008, O.Ed.
  10. ↑ Harris, Michael H. History of Libraries in the Western World, Scarecrow Press Incorporate, 1999, p. 69, ISBN 0810837242
  11. ↑ Norwich, John Julius, A Short History of Byzantium, 1997, Knopf, ISBN 0679450882
  12. ↑ Casini, Lorenzo. "Renaissance Philosophy". In: Internet Encyclopedia of Philosophy — A Peer-Reviewd Academic Resource.
  13. ↑ Burke, P., "The spread of Italian humanism", in The Impact of Humanism on Western Europe, ed. A. Goodman and A. MacKay, London, 1990, p. 2.
  14. ↑ (1974) Scribes and Scholars: A Guide to the Transmission of Greek and Latin Literature. Oxford: Clarendon Press. ISBN 978-0199686339. 
  15. ↑ "Western Philosophy: Renaissance Philosophy". In: Encyclopadedia Britannica online, consulta em 17/10/2017
  16. ↑ Brotton, Jerry. The Renaissance: A Very Short Introduction. Oxford University Press, 2006, s/pp.
  17. ↑ Nunes, Benedito. "Diretrizes da Filosofia no Renascimento". In: Franco, Afonso Arinos de Melo et alii. O Renascimento. Agir / MNBA, 1978, pp. 64-77
  18. ↑ Clare, John D. & Millen, Alan, Italian Renaissance, London, 1994, p. 14.
  19. ↑ Vasari, Giorgio, Lives of the Artists, translated by George Bull, Penguin Classics, 1965, ISBN 0140441646.
  20. ↑ Herfried Münkler, Marina Münkler: Palladio, Andrea. In: Dieselben: Lexikon der Renaissance. München 2000.
  21. ↑ Barbara Borngässer: Architektur der Renaissance in Italien. In: Toman (Hrsg.) 2011.
  22. ↑ 22,0 22,1 22,2 Alexander Rauch: Malerei der Renaissance in Italien. In: Toman (Hrsg.) 2011.
  23. ↑ Alexander Rauch: Malerei der Hochrenaissance in Rom und Mittelitalien. In: Rolf Toman (Hrsg.): Die Kunst der italienischen Renaissance. Tandem Verlag, Potsdam 2007, S. 308.
  24. ↑ Rolf Toman: Einleitung. In: Ders. (Hrsg.): Die Kunst der italienischen Renaissance. Tandem Verlag, Potsdam 2007
  25. ↑ 25,0 25,1 Letteratura italiana 1. Dalle origini al Seicento, a cura di Andrea Battistini, Società editrice il Mulino, 2014, pp. 252-255.
  26. ↑ L'imitazione classica nella commedia italiana del XVI secolo, Vincenzo De Amicis, 1873, p. 56.
  27. ↑ 27,0 27,1 Peter Burke: Die europäische Renaissance. Zentren und Peripherien. Beck, München 2005, ISBN 3-406-52796-5. (Englischsprachige Originalausgabe: Oxford 1998)
  28. ↑ Herfried Münkler und Marina Münkler: Musik. In: Dieselben: Lexikon der Renaissance. München 2000, S. 283 und 285.
  29. ↑ Brotton, J., "Science and Philosophy", The Renaissance: A Very Short Introduction Oxford University Press, 2006 ISBN 0192801635.
  30. ↑ Hunt, Shelby D. (2003). Controversy in marketing theory: for reason, realism, truth, and objectivity. M.E. Sharpe, 18. ISBN 978-0765609328. 
  31. ↑ 31,0 31,1 31,2 Bernd Roeck: Der Morgen der Welt. Geschichte der Renaissance. C. H. Beck, München 2017, ISBN 978-3-406-69876-7.
  32. ↑ (2007) The History of Cartography, Volume Three: Cartography in the European Renaissance. Chicago and London: University of Chicago Press. ISBN 978-0226907338. 
  33. ↑ 33,0 33,1 Open University, Looking at the Renaissance: Religious Context in the Renaissance (Retrieved 10 May 2007)
  34. ↑ Catholic Encyclopedia, Western Schism (Retrieved 10 May 2007)
  35. ↑ Catholic Encyclopedia, Alexander VI (Retrieved 10 May 2007)
  36. ↑ Zuffi, Stefano (2004). Il Quattrocento. Milan: Electa. ISBN 8837023154. 
  37. ↑ 37,0 37,1 (1999) I tempi dell'arte. Bompiani. ISBN 88-451-7212-0. 
  38. ↑ Alison Cole (1995). "Tradition locale et talents importés : Milan et Pavie sous Ludovico le More", La Renaissance dans les cours italiennes (in fr). Paris: Flammarion, 192. 
  39. ↑ Stefano Zuffi, Il Cinquecento, Electa, Milano 2005. ISBN 88-370-3468-7
  40. ↑ Denys Sutton, "Venetian Painting of the Golden Age." Apollo (Archive : 1925–2005) 110, no. 213 (Nov 01, 1979): 374.
  41. ↑ 41,0 41,1 Freedberg, Sydney J. Painting in Italy, 1500–1600, 3rd edn. 1993, Yale, ISBN 0300055870
  42. ↑ Gardner's: Art Through the Ages—International Edition, Brace Harcourt Jovanovich, 9th edition, 1991.
  43. ↑ 43,0 43,1 43,2 Pierluigi De Vecchi ed Elda Cerchiari, I tempi dell'arte, volume 2, Bompiani, Milano 1999. ISBN 88-451-7212-0

Ligam de denter

Modifega

Ligam de fœura

Modifega
Utegnüü da "https://lmo.wikipedia.org/w/index.php?title=Renassiment&oldid=1289809"