Independentism lombard

Ideja che la voeur l'autogoverno de la Lombardia
Lombard Quest articol chì l'è scrivud in lombard, con la Noeuva Ortografia Lombarda
Vedrína
Vedrina
Quest articol chì l'è assee ben faa Vedrina

L'Independentism lombard l'è l'idea politega che la voeul l'istituzzion de 'n Stat sovran per la Lombardia, ed eventualment, per i terre lombardofen e storegament lombard.[1]

"Allegoria de la Lombardia" del Giovanni Baratta

Di voeult l'è sociad e 'l deriva del nazzionalism lombard, ma gh'è anca di reclamazzion domà de orden economegh e social senza considerazzion specifica de nzazionalità.[2][3]

L'è inveci fiss ligad a l'autonomism lombard, tant che pussee de 'na voeulta a l'è vegnuda foeura 'n ideologia unica che la messeda di element independentista e autonomista, che l'è stada ciamada de 'n quajvun "autogovernism" e, a bon cunt, se pòden considerà istoricament compagn.[4] A gh'è anca un bon ligam in tra el moviment per l'autogoverno lombard e 'l federalismo italian.

StoriaModifega

Prima de l'UnitàModifega

 
Carlo Porta, vun di prim independentista lombard

I riferiment pussee vegg a on'unità nazzional lombarda se poeuden trovà a la fin del XVIII secol con la creazzion de la Republega Cispadana e despoeu de quella Cisalpina, quand che el politegh piemontes Carlo Botta l'ha scrivud el liber Proposizione ai Lombardi di una maniera di governo libero, indove che 'l diseva che la Lombardia (ciamada despess in del liber Nazione Lombarda) l'avaria dovud dotàss de na costituzzion independent da quella francesa d'ispirazzion revoluzzionaria[5]. Semper in quej agn li, in tra i partecipant al concors de l'Aministrazzion Sgeneral de la Lombardia dal nom Quale dei Governi liberi meglio convenga alla felicità d'Italia? per la creazzion di proposte per la noeuva costituzzion cispadana, gh'è de manzonà el proget de carta costituzzional del Giuseppe Faroni intitolad Polo Costituzionale per la Repubblica Lombarda, indove a l'è mai doperad el termen Republega Cispadana[6].

I prim moviment, pussee organizad, per l'independenza de la Lombardia vegnen goeura in del period del governa austriegh, e seren despess sociad ai moviment federalista italian, desgià che la pupart di federalista lombard la considerava la Lombardia pussee 'me 'na nazzion che 'me 'na division ministrativa, e 'l midem sentiment a l'éra spantegad anca in di ambient patriotegh e in di sò produzzion, 'me la preghiera satirega "Pater Noster dei Milanesi" che la dis "Che vegga Italia e la nazion lombarda stesse ad un patto"[7].

I prim mot lombard, seren, a bon cunt, pussee autonomista che independentista e domandaven ona Lombardia autogovernada in l'Imperi d'Austria e tanc patriota, 'me el Carlo Cattaneo, a eren contrari a l'intervent di piemontes e a la anession che l'è vegnuda dopo[8][9].

Sgiamò in del 1815 el Carlo Porta el sperava in l'independenza lombarda, anca se l'ha preferd el governa austriegh a quell franzes, de che l'éra on fermo opositor[10][11].

Regn d'Italia e autonomism milanesModifega

 
I mòti de Milan del 1898

Di temp del massacher de Bava Beccaris in del 1898 i font rivad al governo parlaven de on moviment per la restaurazzion del Stat de Milan in Lombardia. 'Sti vos eren probabilment esagerad, ma in del midem period el Filippo Turati, esponent socialista, l'haveva espress l'ideja de 'n Stat lombard governad di lombard, vist i diferenze, a nivell economich, social e de responsabilità, in tra el Nord e 'l Sud del Paes, ispirad anca de la soa contrarietà al Francesco Crispi,[12] diferenze che l'Eugenio Torelli Viollier, el fondator del Corriere della Sera, el gh'haveva evidenziad sgiamò el dì despoeu di repression militari del governo italian, quand che 'l diseva che i proteste i eren no domà socialista, ma anca autonomista[13]. Sto ategiament di socialista italian a l'era criticad di element socialista e federalista de la Bassitalia 'me el Gaetano Salvemini.[14]

El Dario Papa, republegan e autor de on palpee mazzinian, l'ha sostegnud in su L'Italia del Popolo la necessità de fà su 'sto Stat de Milan, in d'on progett ispirad al federalism de la Svizzera vorsud cinquant'agn prima del Carlo Cattaneo e ai ideaj de liberalism, invers al statalism spantegad in Meridion.[12] A Milan, intant, cressen i idej del municipalism in la pupart di partid e in del 1914 i elezzion ministrativ inn vengiud di socialista, cont on programma municipalista e per el des'centrament ministrativ.[15][16]

In del 1895 el giornal "Il Mattino di Napoli", in respoeusta al desideri autonomista, el sponsorizza 'na secession de la Bassitalia cont di articoi assee diffamatori in di confront di lombard, e i giornai lombard ghe responden che se gh'è de fàlla, la secession, bisògna fàlla, e in del midemm ann scomincen di manifestazzion contrari al governo central e i sò tass.

In del 1913, in occasion di scioper che hann menad el Regn d'Italia a moeuver 30'000 soldad pussee giornaj american e canades, el pussee important el The New York Times,[17] hann did che:

 
«I leader [del moviment] inn dree a incoragià i idej separatista, e disen che la Lombardia, la region la pussee prospera, l'è ingiustament forzada a suportà i zone pussee pover del Sud»
(The leaders are encouraging the separatist ideas, arguing that Lombardy, a most prosperous region, is being unjustly forced to support the poorer districts of the South[18])

Republega italianaModifega

 
Umberto Bossi, fondator de la Liga Lombarda, in del 1990 a Pontida

Dòpo de la fin de la segonda guerra mondiala el nass el Moviment Autonomista Bergamasch, che in del 1956 el deventa on partid organizad a nivell regional, el Moviment Autonomista Regional Lombard, e 'l toeu part ai elezzion comunai de Berghem e 'l ciapa el 1,96% di vot, o ben 1239 preferenze. [19]

In del 1958 el toeu part ai elezzion politegh 'me Moviment Autonomista Regional Padan, che 'l domandava l'istituzzion de la Region Lombardia 'me Region Autonoma del Stat Italian, istituzzion poeu fàda in del 1970, 22 agn dòpo de la promulgazion de la Costituzzion e 'l ciapa el 0,24% di vot, o ben 70'589 preferenz.[20][21]

El moviment independentista el deventa però mai on partid de massa finna al 1982 cont el nass de la Lega Lombarda, on partid de ciar stamp autonomista, anti-partitocrazia e independentista, fioeula de 'n union autonomista nassuda in del 1979. In del 1989 la toeu part a la Lega Lombarda - Alleanza Nord che la fonda i bas per la Lega Nord, partid che 'l preferiss pontà a l'independentism padan, senza però renonzià a quell lombard finna al 2018, cont el bandonà de tucc i idej secessionista de part del secretari federal Matteo Salvini[22][23], dopo on period de ambiguità de circa cinch agn.[24]

In del 2013 el nass el moviment CoLoR 44[25] per ona mozzion per on referendum in su l'autodeterminazzion lombarda[26]: la Provincia de Bressa, cont el suport de la magioranza de center-destra e del Giulio Arrighini, e quèlla de Lech, in d'ona version domà autonomista, la voten.[27][28]

El percors de la mozzion el mena al referendum consultiv per l'autonomia del 2017, che l'ha fad, in sui media, parlà de la question anca per la svesinanza temporala cont el referendum per l'independenza de la Catalogna del 2017[29] anca se tecnicament a l'era in su 'n quesit assee diferent, quell catalan in su l'independenza e quell lombard in su l'autonomia in 23 materie, e quell lombard a l'era recognossud del governa central.[30]

El referendum el ved 'n affluenza del 38,5%, cont el Veneto che 'l supera el 57%, e l'è no dònca retegnud on particolar success, anca se 'l permet a la Gionta del Roberto Maroni de dervì i tratative cont el governo Gentiloni.[31][32]

Cont i contemporanee elezzion statai e regionai del 4 de marz 2018 e l'elezzion del noeuv president lombard Attilio Fontana cont la nomina del Stefano Bruno Galli 'me Assessor a l'autonomia la tratativa la se ferma in atesa del noeuv governo italian. [33]

El noeuv governo, fioeul de 'n acord in tra Liga e M5S, el nomina la Erika Stefani 'me minister di Affari Regionai e di Autonomie, che la se impegna a dà l'autonomia prevista de la Costituzzion a la Lombardia e al Veneto. [34]

SimboiModifega

  Per savenn pussee, varda i articoi Simboi de la Lombardia e Bandera del Nord Italia.
 
El Monument al Guerriee de Legnan, prima simbol del MARL e poeu de la Liga

L'independentism lombard el gh'ha no di simboi univoch che inn compartid de tucc i partid.

El pussee famos al dì d'incoeu a l'è la statoa al Guerriee de Legnan, despess sociada per eror con l'Albert de Giussan, che a l'è comparsa per la prima voeulta in del 1959 in sul giornal La Regione Lombarda, orghen oficial del MARL[35][36]. Doperad poeu 'me simbol de la Liga Lombarda, a l'è deventada poeu simbol de la Liga Nord e incoeu a l'è retegnud squasi esclusivament on simbol leghista.[37].

La Cros de San Giorg a l'è retegnuda de solet on simbol de la pupart di independentista lombard[38][39], anca se di moviment hann defendud el Ducal[40], o ben la bandera stòrega del Ducafd de Milan, la Roeusa Camuna[41] o 'na bandera ispirada a quèlla di volontari federalista lombard del 1848, cont la Cros de San Giorg in d'on camp verd.[42][43] Gh'è anca l'ipotesi de doperà ona bandera con dent insema la Cros de San Giorg e 'l Bisson Viscontee[44].

Moviment independenstista lombardModifega

 
Coreografia independentista cont el foeugh

Gh'è on poo de moviment che voeuren l'independenza de la Lombardia, ma poch inn ativ incoeu, e vann ideologicament dal liberalism a la destra, di voeult estrema.[45]

Incoeu el moviment pussee ativ a l'è Pro Lombardia Indipendenza, moviment centrista e de ispirazion liberal.[46]

A suportà l'independenza lombarda a gh'è anca di alter partid pussee piscinit 'me Indipendenza Lombarda, entrad in Grande Nord, Fronte Indipendentista Lombardia e Identità Oltrepò.[47][48]

Storicament se pò regordà Domà Nunch, moviment ecologista e independentista che l'è deventad 'na sociazzion[49], Avanti Lombardia, entrad poeu in Pro Lombardia[50] e la Lega Lombarda, incoeu sezzion regionala lombarda del partid nazionalista italian de destra[51] Lega Nord che l'ha scernud de mantegnì el sò simbol e nom.[52]

Anca di sociazzion de coltura e de economìa hann supportad l'independenza, 'me Terra Insubre, Brescia Patria, Terre di Lombardia, che la ved la partecipazzion del Gianni Fava[53], 300 Lombardi e 'l Tea Party Lombardia, che 'l ved in l'independenza 'na manera de liberàss di volt tasse italian[54][55][56].

In la literadura lombardaModifega

Sgiamò el Carlo Porta el mostrava di penser independentista in la soa poesia[57], con l'esempi classegh de Paracar che scappee de Lombardia indova che 'l parlava di domini forester 'me di boja che scannen la Lombardia, in tra i che, dopo di problema del governo napoleonegh, se podeva nanca vesser indeferent, ma anca in La Ninetta del Verzee el parlava sgiamò del besogn de un governo che 'l fuss no né la Franza, né la Spagna e né l'Austria, representad del Sciampagn, de l'Alicant e del Tocaj, con poeu una metafora assee autodeterminazzionista, ciovè "per el stomegh d’on bon Milanes, ghe va robba del noster paes". In la poesia A certi forestee che viven a Milan el se mostra propi indiferent in sui italian, che 'l ved 'me forester, e 'l dubita del Stat che 'l Napoleon l'haveva formad e de la necessità de fàll su coj mort.[58]

In la novella L'Anarchich ricostituent del Luis Pavia el personagg principal del Seghizz a l'è propi contra el centralismo di piemontes e 'l fa, in pratega, un manifest contra el centralismo e a favor del federalismo, del municipalismo e de 'na renonzia ai principi del nazzionalismo.

RiferimentModifega

  1. La Lombardia Storica
  2. “Salut Lombardia!” I deliri del movimento nazionalista lombardo
  3. Da Tea Party Italia a Tea Party Indipendenza?
  4. l'Italia dice sì al referendum del Veneto
  5. Carlo Botta - Biografia
  6. Polo Costituzionale per la Repubblica Lombarda
  7. Pater Noster dei Milanesi
  8. Cattaneo, Carlo - Enciclopedia dei Ragazzi
  9. Savoia o federalismo? La svolta centralista nelle Cinque giornate della Milano insorta
  10. Carlo Porta, grande poeta italiano di lingua milanese
  11. Monumento a Carlo Porta
  12. 12,0 12,1 Fu Milano a tentare la prima secessione dall’Italia. E lo fece la sinistra!
  13. Autonomia: da due secoli sogno lombardo
  14. Federalismo, socialismo e questione meridionale in Gaetano Salvemini
  15. CENT’ANNI FA IL PRIMO SINDACO SOCIALISTA A MILANO
  16. Milano e la borghesia degli imprenditori
  17. MORE MILAN RIOTS; 30,000 TROOPS OUT; Strike Leaders Demand the Separation of Lombardy from Rest of Italy.
  18. Test del giornal
  19. The Movimento Autonomista Bergamasco and the Lega Nord: continuities and discontinuities
  20. Che cosa vuole il M.A.R.L.
  21. E Guareschi bacchettò Calderoli (nonno)
  22. Lega Nord, dizionario di Storia
  23. Salvini: "Nel 2018 la Lega non parla più di secessione"
  24. Lega Nord, la base chiede ancora la secessione a Salvini: “Ok il consenso, ma non dimenticare il tuo popolo”
  25. Iniziativa per tutti i lombardi e non di una parte politica
  26. Autodeterminazione del popolo lombardo, dura risposta del comitato CoLoR44
  27. Indipendenza Lombardia: il consiglio provinciale di Brescia approva la mozione per referendum
  28. Approvata la risoluzione Color44: anche Lecco chiede il referendum per l'autonomia lombarda
  29. Dal Pirellone alla Laguna: indipendentismo lombardo-veneto
  30. Beyond Catalonia: pro-independence movements in Europe
  31. Il Veneto supera il quorum (57,2%), Sì al 98,1%. Lombardia, affluenza del 38,5%
  32. Regione Lombardia, ecco i 6 punti della trattativa con Roma sull’autonomia
  33. Autonomia, Regione Lombardia: "Ripartiranno le trattative col nuovo governo"
  34. Il ministro Erika Stefani: "Realizzerò l'autonomia di Veneto e Lombardia". Bonaccini: "E l'Emilia?"
  35. Il simbolo del Carroccio? Nacque prima della Lega (lombarda)
  36. I segreti dello spadone da Giussano
  37. La storia del simbolo della Lega Nord
  38. The many Crosses of St. George
  39. Croce di San Giorgio: la bandiera dei lombardi
  40. Il ducale simbolo dell’Insubria non è inventato
  41. Collettivo Avanti: Rosa Camuna la nostra bandiera
  42. Proposta per una bandiera lombarda
  43. A flag for Northern Italy
  44. Bene la bandiera lombarda, ma niente "italianate"
  45. Cosa c’è dietro la crescente voglia indipendentista in Lombardia
  46. Il movimento per la Lombardia indipendente
  47. Arrighini e quel sogno chiamato Grande Nord
  48. Autonomia territori. Identità Oltrepò invitata al Congresso dell’Union Valdotaine
  49. Autonomisti e verdi, ma non leghisti. Nelle terre varesine nascono i Domà Nunch
  50. AVANTI LOMBARDIA CONFLUISCE IN PRO LOMBARDIA INDIPENDENZA
  51. Le giravolte della Lega di Salvini sono pura tattica. Parla Carlo Lottieri
  52. Maroni: "Via 'Nord' dal simbolo? Qui siamo la Lega Lombarda"
  53. Terre di Lombardia - Giannifava.org
  54. Omaggio del siciliano Buttafuoco agli irriducibili di Terra Insubre
  55. Brescia Patria in piazza per le «dieci giornate»
  56. Nasce a Cavaria “300 Lombardi” associazione per l’Indipendenza della Lombardia
  57. "Carlo Porta, un campione di lombardismo"
  58. La patria del Porta (ovvero: contro le forzature nazionalistiche)

BibliografiaModifega

  • Napoleone Colajanni, L'Italia nel 1898: Tumulti e reazione (1898), Milano, Società Editrice Lombarda, 1898.
  • Guido Calderoli, Zibaldone autonomista d'un montanaro bergamasco, Bergamo, Tip. TOM, 1958, pp. 278.
  • Anselmo Freddi, Breve storia del MAB, Bergamo, Tip. F.lli Carrara, 1963, pp. 23.
  • Romano Bracalini, Brandelli d'Italia. 150 anni di conflitti Nord-Sud, Bergamo, Rubbetino, 2011.
  • Gilberto Oneto, Marco Bassani, La questione settentrionale: la Padania fra mito, storia e realtà, 2008.
  • Luigi Pavia, El miracol de Carabolla e alter novell in milanes, Bergom, 1921.

Vos coreladeModifega