Referendum Costituzional del 2016 in Italia

Lumbard ucidental Quest articol chì l'è scrivuu in lombard, grafia milanesa.
Vedrína

El 4 de dicember del 2016 in Italia gh'è staa on referendum per confermà o scassà la Reforma costituzionala Renzi-Boschi, approvada dal Parlament el 12 de april del 2016, cont i «disposizion per superà el bicameralism paritari, el sbassà el numer di parlamentar, el contegnì el cost del fonzionà di istituzion, la sopression del CNEL e la revision del titol V de la part II de la Costituzion».

Vedrina
Vedrina
Quest articol chì l'è in la Vedrina de la Wikipedia Vedrina
Urna e scheda

Vist che l'è staa approvaa da men di 2/3 di Deputaa e di Senator, l'è staa faa on referendum, primma su richiesta di parlamentar, e poeu cont i firm del Comitaa per el Sì, l'unegh ad avè superaa i 500'000 firm necessari per fà el referendum.

In di primm mes de la Reforma la gh'aveva on bon gradiment in l'elettoraa, ma dopo del primm trimester del 2016 el s'è sbassaa fiss, anca grazia a la personalizzazion del referendum del premier italian Matteo Renzi, che l'ha dii che l'era pront a dimettès se 'l perd el referendum.

A la fin el referendum l'ha vist 'n affluenza volta de bon (68% in Italia, 65% cont el vot di italian a l'estero), e 'l Popol l'ha scernuu de scassà la reforma. A favor de la reforma, inveci, el vot di italian in di Stat forest, on vot assee contestaa, sia in di modalità postal, cont on ricors daa su de l'Antonio Guadagnini, sia per ona lettera de propaganda rivada insemma, in d'on quaj cas, a la scheda e per di problema per i reppresentant de lista del no, segnaa per el sì e donca tegnuu foeura per ona quaj ora di segg speciai.

In d'on descor a mizanocc e mezza del 5 de dicember el Matteo Renzi l'ha recognossuu la sconfitta e l'ha annonziaa i sò dimission, dopo avè ciappaa tutta la responsabilità politega de la sconfitta e avè rengraziaa i elettor e quej di comitaa per el sì.

Retroscena Modifega

Retroscena costituzional Modifega

El sistema italian l'è on bicameralism perfett, ossia sia la Cambra di Deputaa che 'l Senad de la Republica hinn important istess.

De facc on governo el gh'ha de besogn de la fiducia de tucc e du i camber, e ona legg approvada de 'na Cambra la gh'ha de vess approvada istessa in l'altra.

Retroscena politegh Modifega

Giamò in di agn 1980 gh'eren staa di proeuv per cambià el Senad rivaa finna al 1998 cont ona commission del Massimo D'Alema, ma l'è succeduu nagòtt.

In del 2005 el Parlament l'approva ona reforma voruda dal Silvio Berlusconi che la dava la devolution ai Region e la rafforzava el poder del primm minister. In del 2006 el Popol l'ha scassaa la reforma.

In del 2011, con la crisi economica, el Berluscon el dà i sò dimission, e la division in tra El Popol de la Libertà e 'l Partii Democrategh la mena a nagòtt.

 
El Renzi

Ai elezion del 2013, ch'hann daa la maggioranza a la Cambra al Partii Democrategh, la reforma l'è staa on argoment assee important, e in del 2014 a l'è nominaa premier el noeuv Segretari del PD Matteo Renzi, al post de l'Enrico Letta.

In del sò programma i reform i eren present fiss, comé quella del lavora e de la scoeura. Quella costituzionala la gh'aveva de scancelà el bicameralism paritari e cavà via podè al Senad.

In del genar del 2016 l'ha daa 'me dada del referendum ottober e l'ha dii de vess segur de l'appogg di italian. Semper a genar La Repubblica la dà la noeuva che 'l Renzi l'ha ciappaa 'l Jim Messina, omm de la campagna del Barack Obama, per la campagna del sì.

La reforma Modifega

  Per savenn pussee, varda l'articol Reforma costituzionala Renzi-Boschi.

El Senad Modifega

 
Palazz Madama, sed del Senad italian

El noeuv Senad de la reforma el gh'ha de intervenì obbligatoriament domà in d'ona quaj situazion, per i alter cas el sò vot l'è facoltativ e 'l pò vess nulaa cont on second vot de la Cambra di Deputaa.

I Senator i gh'ha la midemma immunitaa di Deputaa ma minga l'indennità. El Senad el gh'aveva de vess inscì:

  • 95 Senator nominaa di Consili Regionai e di Consili Provinciai de Trent e Bolzan in tra i Sindegh e i Consijee Regional
  • 5 Senator nominaa dal President per 7 agn
  • I vegg President, a vita

Competenz Stat-Region Modifega

La reforma la cava via tucc i competenz concorrent in tra 'l Stat e i Region, che van de noeuv al Stat: De facc l'è 'n perd de poder per i Region a Statut Ordinari. Nonostant che a l'è mettuda 'me competenza esclusiva di Region la rappresentazion di minoranz lenguistegh.

I Region a Statut special a hinn minga toccaa de la reforma, anca se gh'è 'l ris'c, se 'l Senad el fuss staa convocaa primma del 2018 de dàgh no i Senator, vist che i sò Statut disen che un Consijee Regional el pò mia vess anca parlamentar, e donca sarien staa de modifegà prima de l'entrada in vigor de la reforma, in del 2018.

Provincc Modifega

La reforma la cava via i provincc, che resten sotta la legg ordinaria: A hinn toccaa no i Città metropolitan. Nonostant che la Reforma la parlava di Ent de vasta area, ossia di istituzion che podeven sostituì i provincc.

Alter cambiament Modifega

  • I firm per insubì ona legg passen da 50'000 a 150'000, ma el Parlament l'è obbligaa a votàj.
  • A l'è abolii el CNEL.
  • Se i firm per on referendum abrogativ hinn 800'000 gh'è on quorum sbassaa.
  • Legg elettorala controllada da la Cort Costituzionala.
  • El Stat de Guerra a l'è deciaraa domà da la Cambra di Deputaa, ma da la maggioranza assoluda di component.

La domanda Modifega

 
Scheda elettorala

La domanda del referendum l'era:

Approvate il testo della legge costituzionale concernente «Disposizioni per il superamento del bicameralismo paritario, la riduzione del numero dei parlamentari, il contenimento dei costi di funzionamento delle istituzioni, la soppressione del CNEL e la revisione del titolo V della parte II della Costituzione» approvato dal Parlamento e pubblicato nella Gazzetta Ufficiale n. 88 del 15 aprile 2016?

Approvee el test de la legg costituzionala che la parla de «disposizion per superà el bicameralism paritari, el sbassà el numer di parlamentar, el contegnì el cost del fonzionà di istituzion, la sopression del CNEL e la revision del titol V de la part II de la Costituzion» approvaa dal Parlament e publegaa in la Gazzetta Offiziala n. 88 del 15 de april 2016?

Intorna a la domanda gh'è staa tant rebelott: De facc i comitaa per el No trovaven la domanda ona gabola, che la mostra domà i vantagg de la reforma senza i sò difett. Hinn staa daa su on poo de ricors: Al TAR, al Consili de Stat, a di tribunai ordinari e anca a la Cort de Cassazion, che l'ha deciduu a pocch dì dal vot che la legg de indizion del president Sergio Mattarella la pò minga vess sindacada.

El despacchettament Modifega

L'era stada avanzada anca la proposta de despacchettà el referendum, ossia de divid la domanda in tant domand per ogni pont de la reforma. A l'inizzi l'era supportaa dal Movimento 5 Stelle e di Radicali italiani, e l'era 'na proposta senza precedent, vist che tucc i referendum costituzionaj precedent eren staa faa a blocch unegh. Donca 'l se pensava che domà 'n iniziativa del Parlament la podeva despacchettà el referendum.

Eren interessaa al despacchettament squasi tucc i partii: Dal PD del Renzi a l'opposizion, ma pocch han aderii, donca l'è remagnuda domà 'n ipotesi e l'è stada votada domà 'na domanda.

L'approvazion del despacchettament l'avaria slongaa anmò i temp, vist el necessari pronunciament de la Cort de Cassazion, finna a la primavera del 2017.

Posizion Modifega

Comitaa Modifega

Scerna Campagna Slogan Sitt
L'è assee on Sì
Basta un Sì
www.bastaunsi.it
No
Comitaa per el No
Comitato per il No
www.comitatoperilno.it
Mi voti No
Io Voto No
www.iovotono.it

Partii politegh Modifega

Nivell statal Modifega

Scerna Partii Leader Ideja politega
Partii Democrategh Matteo Renzi center-sinistra
Noeuv Centerdestra Angelino Alfano center-destra
ALA Denis Verdini center-destra
Fare! Flavio Tosi center-destra
federalism
No Moviment 5 Stell Beppe Grillo popolism
Lega Nord Matteo Salvini popolism
regionalism
center-destra
federalism
(Part de la Lega: independentism)
Noi con Salvini
Forza Italia Silvio Berlusconi center-destra
Fratelli d'Italia - Alleanza Nazionale Giorgia Meloni destra
Sinistra Italiana Arturo Scotto socialdemocrazia
Possibile Giuseppe Civati center-sinistra
CasaPound Simone di Stefano estrema destra
Minoranza PD, poeu sortida in del MDP Pier Luigi Bersani, Massimo D'Alema, Roberto Speranza center-sinistra

Nivell regional Modifega

Scerna Partii Ideja politega Region
Südtiroler Volkspartei Autonomism
center-sinistra
Südtirol
Stella Alpina Autonomism
federalism
Val d'Aosta
Union Valdôtaine Autonomism Val d'Aosta
No Avanti Lombardia Autonomism
independentism
Lombardia
Pro Lombardia Independentism Lombardia
Süd-Tiroler Freiheit Independentism Südtirol
Siamo Veneto Autodeterminazion Veneto
Partidu Sardu Independentism Sardegna
Die Freiheitlichen Independentism
destra
Südtirol
Union Valdôtaine Progressiste Autonomism Val d'Aosta
Sanca Veneta Federalism
Socialdemocrazia
Veneto

Sindacaa Modifega

Eren s'ceraa per el sì:

Per el no:

E neutral la:

Giornai Modifega

Scerna Giornal Orientament politegh
L'Unità Giornal del Partii Democrategh
Il Sole 24 Ore Business
Il Foglio Conservatorism
No Il Fatto Quotidiano Anti-establishment, Popolism
Il Giornale Conservatorism
Libero Conservatorism
Il manifesto Comunism
Neutral La Repubblica Socialism liberal
Corriere della Sera Centrism
La Stampa Centrism

Alter organizzazion Modifega

L'Associazion Nazionala di Partigian italian l'ha el sò support al no al referendum, per defend la costituzion antifassista. I Associazion cristian di lavorador italian eren per el sì.

Sondagg Modifega

 
Media mensil di sì e di no.

I primm sondagg d'opinion faa anmò longh l'iter de approvazion daven on'alta percentual de favorevol a la reforma, squasi el 70% al nett di indecis, e inscì l'è staa in squasi tucc i sondagg del 2015 e domà l'Istituu Ixé l'ha daa 'na maggioranza de no in d'ona quaj occasion.

Anca in di primm mes del 2016 i istituu daven on'alta probabilità de vittoria dei sì, anca se cont i indecis a squasi el 50%, ma cont el svesinàss de l'approvazion i contrari hinn cressuu, grazia anca a l'inizzi de la campagna per el no e a la politicizzazion del referendum abrogativ de april e ad april i medij hinn rivaa a la pari e a giugn el no l'ha superaa el sì. I osservator l'han mituu in correlazion cont on sbassament de la popolarità del governo Renzi, e de facc el 40% di elettor l'ha deciaraa de votà no in su la reforma ma in sul governo.

A l'indizion del referendum (settember 2016) el No l'era anmo sora, da l'1 al 10% a segonda de l'Istituu, ma i indecis eren anmò alt: Di sondagg de opinion faa in quel period daven comé tratt preferii de la reforma el superà del bicameralism perfett e 'l sbassà di Senator, ma comé tratt critegh el sbassà di poder ai Region e l'elezion indiretta del Senad de la Republica. Sta situazion l'è restada invariada longh la campagna elettorala, finna a la fin del termin legal per publegà i sondagg.

In di ultim sondagg l'era dada 'na possibilità al sì domà del 20% circa, quej che votaven in sul governo s'hinn volzaa al 56% e anca la percentual de quej che voreven i dimission del Renzi se 'l vingeva el No eren volt fiss. I Istituu han daa 'me favorida la vittoria del No cont el 51-53%.

I exit poll clandestin, faa giraa intorna ai noeuv or de la sira, daven la vittoria del No cont el 56-59.

El vot Modifega

 
Scheda voltada in Lombard

I segg hinn staa vert ai or 16:00 del 3 de dicember per organizzà i operazion de vot scominciaa ai or 7:00 del 4 de dicember finna ai or 23:00. Tucc i cittadin cont pussee de 18 agn han poduu votà, e i gh'ha de portà al segg on document de identità e la tessera elettorala. In di segg ghe vegn daa 'na scheda elettorala e 'n lapis copiativ per votà. In su 'sti lapis chi l'è vegnuu foeura on pienon el di di votazion, dopo che di cittadin han segnalaa che podeven vess scancellaa, e anca el cantant Piero Pelù l'ha publegaa 'sta noeuva chi. El ministee di interni l'ha tranquillizzaa i gent e l'ha dii che in su la scheda el segn el resta. In Calabria la DIGOS l'ha cambiaa di lapis.

Gh'è staa anca el vot di italian a l'estero, rivaa per posta ai ambassad e ai consolaa e mandaa in Italia cont ona valigia diplomadega compagnada. I vot hinn staa scrutinaa a Castelnuovo di Porto, arent a Roma, in di segg speciai.

Resultaa Modifega

 
El resultaa region per region, in ross el no, in verd el sì
Resultaa Preferenz Percentual in sul vot valid Percentual in sui votant Percentual in sui elettor
13.432.208 40,89%
NO 19.419.507 59,11%
Sched bianch 83.417 0,25%
Sched null 306.952 0,92%
Sched contestaa 1.761 0,00%
Total 33.243.845 65,47%

Affluenza Modifega

Area Or 12:00 Or 19:00 Definitiva
Italia 20,14% 57,22% 68,48%
Forest 30,74%
Total 65,47%

Resultaa per region Modifega

 
Resultaa per provincia
 
Resultaa per provincia (pussee detali)
Region No Affluenza
Preferenz % vot val. Preferenz % vot val. Votant % elett.
  Abruz 255 022 35,61% 461 167 64,39% 722 930 68,71%
  Basilicada 98 924 34,11% 191 081 65,89% 293 546 62,85%
  Calabria 276 384 32,98% 561 557 67,02% 845 775 54,43%
  Campania 839 692 31,48% 1 827 768 68,52% 2 689 070 58,88%
  Emilia-Romagna 1 262 484 50,39% 1 242 992 49,61% 2 526 230 75,93%
  Friul-Venezia Giulia 267 379 39,03% 417 732 60,97% 690 717 72,51%
  Lazio 1 108 768 36,68% 1 914 397 63,32% 3 044 673 69,16%
  Liguria 342 671 39,92% 515 777 60,08% 865 756 69,73%
  Lombardia 2 453 095 44,51% 3 058 051 55,49% 5 552 510 74,22%
  Marqe 385 877 44,95% 472 656 55,05% 866 233 72,84%
  Molise 63 695 39,22% 98 728 60,78% 164 038 63,92%
  Piemont 1 055 043 43,53% 1 368 507 56,47% 2 446 664 72,03%
  Puglia 659 354 32,84% 1 348 573 67,16% 2 024 651 61,71%
  Sardegna 237 280 27,78% 616 791 72,22% 859 158 62,45%
  Sicilia 642 980 28,42% 1 619 828 71,58% 2 284 254 56,65%
  Toscana 1 105 769 52,51% 1 000 008 47,49% 2 125 053 74,45%
  Trentin-Sud Tirol 305 322 53,87% 261 473 46,13% 572 486 72,23%
  Umbria 240 346 48,83% 251 908 51,17% 496 406 73,47%
  Vall d'Aosta 30 568 43,25% 40 116 56,75% 71 717 71,90%
  Veneto 1 078 883 38,06% 1 756 144 61,94% 2 856 049 76,66%
Total Italia 12 709 536 40,05% 19 025 254 59,95% 31 997 916 68,48%
  Estero 722 672 64,70% 394 253 35,30% 1 245 929 30,74%
Total compl. 13 432 208 40,89% 19 419 507 59,11% 33 243 845 65,47%

Conseguenz Modifega

 
Renzi el parla dopo del referendum

Volevo cancellare le troppe poltrone della politica italiana: il Senato, le province, il CNEL. Non ce l'ho fatta e allora la poltrona che salta è la mia

Vorevi scancellà i tropp cadregh de la politega italiana: el Senad, i provincc, el CNEL. Ghe l'hoo fada no e donca la cadrega che la salta l'è la mia
-Matteo Renzi

Vist el resultaa, ciar e nett finna di primm exit poll, intorna a la mizanocc e mezza del 5 de dicember el Matteo Renzi l'ha faa 'na conferenza stampa per ciappàss la responsabilità politega de la sconfitta e annoncià i sò dimission, daa in del dopomezzdì al Sergio Mattarella e sospenduu finna a l'approvazion de la manovra finanziaria.

Appena rivaa i primm resultaa l'Euro l'è andaa sotta al dollar pussee del referendum per la Brexit, per poeu rialzàss in del dì.

Dopo di dimission l'è vegnuda incertezza in sul dafàss: El Movimento 5 Stelle l'ha domandaa elezion subit con l'Italicum, seguii subit de la Lega Nord. L'Angelino Alfano l'ha parlaa in television de elezion a febrar 2017, inveci Forza Italia, la minoranza de sinistra del Partito Democratico e Sinistra Italiana hinn staa pussee cautt.

La sira del 7 de dicember, dopo l'approvazion de la manovra, el Mattarella l'accetta i dimission del Renzi, dopo mezz'ora de colloqui.

El 11 de dicember el Mattarella el da l'incaregh de formà on governo a l'ex minister di affar forest, el Paolo Gentiloni, che l'accetta con riserva. El 14 de dicember el sò governo el gh'ha avuu la fiducia di dò camber e 'l scomincia a lavorà normalment.

Anca el Partii Democrategh el gh'ha avuu di scosson: El Renzi, a febrar 2017, l'ha daa i sò dimission da Segretari, e hinn staa convocaa di elezion primari per el 30 de april del 2017, 'na part de la minoranza per el no l'è sortida del partii per fondà i Democrategh e Progressista e 'l president de la Puja Michele Emiliano l'ha sfidaa Renzi per la segreteria, dopo avè sostegnuu el No al referendum, anca se l'ha faa no campagna diretta per s'ceppà minga el partii.

La legg elettoral Modifega

Dopo del referendum la legg Italicum, progettada proppi per el noeuv sistema politegh poeu scassaa l'è stada deciarada parzialment incostituzional, cont l'eliminazion del ballottagg in tra i list pussee votaa per dà el premi de maggioranza.

Tra l'alter vist che i elezion per el Senad sarien staa faa pu, el Senad el s'è trovaa cont l'inscì ciamaa "Consultellum", 'na variazion del Porcellum che, a differenza de l'Italicum, la premia i coalizion, che in l'Italicum costituzional gh'hinn no.

I partii s'hinn minga trovaa subit d'accordi, ma in tra la fin de magg e l'inizi de giugn del 2017 la pupart di partii han accettaa on compromess fondaa in sul sistema elettoral todesch.

Per via de l'approvazion de on emendament in su la situazion elettoral del Trentin però el patt a l'è saltaa a la mità de luj, e i partii han deciduu de remandà la discussion a settember.

I partii han trovaa 'n accordi in l'ottober per el Rosatellum Bis, ossia on sistema per 1/3 maggioritari e per 2/3 proporzional.

Noeuv elezion Modifega

  Per savenn pussee, varda l'articol Elezion politegh italian del 2018.

A dicember 2017 a hinn staa desligaa i Camber del Sergio Mattarella, pocch prima de la scadenza naturala de la legislatura.

In del 2020 el gh'è staaa 'n noeuv referendum domà in sul tajà di parlamentar, che l'ha vist passà el taj.

Riferiment Modifega