Super-cèllula
Ona super-cèllula a l’è on temporal caratterizzàa de la presenza de on meso-ciclon, o ben ona corrent ascendenta giranta che la po’ vèss larga fin a 32km e che la pò durà fina anca per quatter or.[1][2]In di particolar condizion tèrmodinamich la corrent ascendenta de on temporal la diventa giranta, iscì el sistèma el se auto-alimenta grazie al girament. La nivola la ghe roeuda intorna a la corrent ascendenta e la corrent discendenta la ven trada dent de noeuv ind quèla ascendenta. [3]
Ona super-cèllula la nass ‘me cèllula ùnega, cèllula multipla o linea de temporaj, e poeu la diventa ‘na super-cèllula. La corrent ascedenta giranta la pò ingenerà 'na tromba d’aria[4], de tutt i maner domà del 30% o men di super-cèllul a ven foeura ona tromba d’aria.[5] De sorapù ona super-cèllula la produs tanta tempèsta, di vent fòrt e on consistent rebùff discendent.
Condizion atmosferegh per el sò svilupp
ModifegaDe già che per el svilupp de ona super – cèllula in important ona forta correnta ascendenta e el girament, se poden doperà di indes de valutà sti fattór chì:
|
Per savenn pussee, varda l'articol Energia potenzial convettiva disponibil. |
|
|
Per savenn pussee, varda l'articol Indes de minaccia de borineri. |
|
|
Per savenn pussee, varda l'articol Indes de sollevament. |
|
|
Per savenn pussee, varda l'articol Forbes del vent. |
|
|
Per savenn pussee, varda l'articol Numer complessiv del Richardson. |
Ona super-cèllula la nass in orizzontal cont on girament giamò present (o ben tecnicament per via de on’alta fòrbes del vent); l’alta fòrbes del vent la caosa de la vorticità orizzontala che poeu la ven tirada su in vertical fin a la scima de la nivula per mèzz de ona fòrta corrent ascendenta. Al princippi, ancasì , l’è mej che ghe sia anca ona inversadura tèrmica ai quòt medi (2-4 km) che la faga el mestée del covèrc per el svilupp vertical de la corrent ascendenta, covèrc che poe el salta via quand che la riva de l’aria pussée frèccia in quòta e la corrent ascendenta la va su d’ona manera eplosiva, [6] fin anca a fa formà la cupola del cumulonemb quand che l’aria la sbora foeura de la sommitàa de la nivola. I precipitazion pussée fòrt se formen proppi in del sit la correnta ascendenta calda e ùmeda, intanta che la va su la ciappa denter l’aria pussée frèccia che riva in quòta per advezion. El fòrt contrast de temperadùra l’indùs fòrt condensa e precipitazion, e indoe se ciappen denter i dò corrent se forma on mur (nivola a mur), e la nivola la pò sbassass a formà ona nivola a pedrioeu e in casi estrèmm anca ona tromba d’aria.
 |
 |
|
Element notabil
Modifega
Elemént essenziaj de ‘na super-cèllula hinn:
- ona enòrme base che la va innanz, e la pirla (in sens orari in del’emisfero nòrd) de sòlit la gh'ha ona nivula a mensola;
- la nivola a mur e la nivula a coa da la part contraria rispètt a la base che la và innanz (de sòlit a sud-òvest in del’emisfero sud).
- ona cupola del cumulonemb in su la soa scima. La cupola a l’è el risultàa de ‘na potenta corrent ascendenta che la sbora foeura de là de la troposfera, de già che a la fin del la troposfera (altèzza circa 12000 km) gh’è ona fòrta inversadura tèrmica[8][9]
Sti tri element chì hinn essenziaj, peou pòden anca vèssegh:
- di possibil fass de nivol a la base del temporal adrèe al fluss in entrada che l’alimenta el temporal, che vànn vèrs el center del temporal (adrèe al fluss in entrada);
- ona possibil linea de fianch, ch’a l’è ona linea de cumul medi e congèst che la se forma adrée al fluss in entrada arent a la correnta ascedenta principal, a l’è important per la formazion de la linea la discesa de la corrent discendenta, soratutt de ona soa part che la va de drée (ciamada RFD) rispétt a la corrent ascendenta, e la ruza l’aria che la va su a fa su di nìvol e temporaj pussé piccoj che poeu tenden a vegnì tirà dent de noeuv ind la corrent ascendenta principal.[11] [10]
- ona incudin sòtt-vent. L’incudin la se forma quand che l’aria de la corrent ascendenta la pò nò andà su pussée perché l’è rivada a la fin de la tropofera indoe la comenza l’inversadura tèrmica de la stratosfera. L’inversadura tèrmica la blòcca ògni salida e iscì l’aria la ghe se spantega addòss a fa su on’incudin. [12] [10]
- di fass de fòrt precipitazion[10].
- i nivul mammatus che hinn di nivol fàa su de acqueri che riessen minga a vegnì giò perchè incontren de l’aria pussée sècca che je fà svaporà o anca perché l’acqua intanta che la ven giò la se scalda per via de perché la pression che la va su come che la quòta la diminuiss e donca svapóren.[13]
- ona zona senza precipitazion (a sud in del’emisfero nòrd) sòta la corrent ascendenta.
Mòto
ModifegaI super-cèllul, de sòlit hinn isolàa di alter temporaj, ancabèn ‘na quaj vòlta poden vèss inclùs ind ‘na linea de temporaj. I super-cèllul, a differenza di alter tipi de temporaj a se moeuven minga second el fluss medi di vent ma gh’hànn ‘na direzion de sòlit pussée girada a drizza o men despèss a sinistra (second indoe la gira la fòrbes del vent).
Organizzazion di corrent de ‘na super-cèllula classica
Modifega
La super-cèllula a l’è on ciclon de media scala caratterizzàa de ona corrent ascendenta giranta al center e in sul fianch dedrèe e dò zòn per i corrent discendent, vuna in del sò fianch innanz (FFD- da la lengua inglesa forward flank downdraft) e l’altra ind la sò fianch de drèe (RFD- da la lengua inglesa rear flank downdraft). La corrent discendenta in sul fianch innanz (FFD) a l’è generalment l’area di precipitazion pussée fòrt e spantegàda; in sul bòrd che ’l va innanz de sta corrent discendent chì, a se forma ona nivola a mensola indoe che l’aria reffreggiata da la pioeva la se spantega intorna e l’incontra l’aria de foeura pussé calda e ùmeda. [14]
La supercèllula, ancabèn la sìa pussée piccola de on ciclon extra-tropical, o ben de media scala (o meso-scala) la gh’ha on pseudo-front cald e on pseudo-front frècc compagn de quèj di ciclon extra-tropicaj. El front cald el se forma in su la linea de confin tra el fluss in entrada e l’FFD, inveci el front frècc el se forma in su la linea de confin tra el fluss in enetrada e l’RFD. Ancasì se forma on front di rebùff che l’è la linea indoe el va innanz l’FFD. [14]
La corrent in sul fianch dedrée la se forma quand che i vent principaj ai quòt medi ghe vann addòss a la corrent ascendeta principal e tachen a giragh intorna in tucc i direzion, el fluss che ‘l va in sul dedrèe el divent l’RFD che l’è ona corrent d’aria che la pò fa di dagn spantegàa per via del èvent fòrt e la se ved al radar ‘me on eco a rampin.
L’occlusion: el moment pussee pericolos
ModifegaE com’è che ’l succed ind on ciclon extra-tropical quand ch’el front frècc el raggòng quèll cald a se ingenera on front occlus, se parla donca de meso-cliclon occlus. A l’è proppi el moment dell’occlusion a ris’c de tromb d’aria perché lilinscì la vorticità de la corrent ascendenta la ven sarada denter ind ona zòna ristrètta. [15]
Esauriment de ‘na super-cèllula
ModifegaEl collàss de ona super-cèllula el po’ succed per càosa de:
- occlusion, perché dòpo l’occlusion la corrent discedenta l’è pussée fòrta de quella ascendenta;
- alter reson che fànn vegnì men la fòrbes del vent.
Ona super-cèllula innanz de collassà la pò traformàss in on sistèma a cèllula multipla oppùr in dona super-cèllula a fòrt precipitazion [16]
Anàlisi al radar
ModifegaAl radar la super-cèllula l’è redonda a fass concentrich con valor de precipitazion altissim in del center, e ‘na coa de pioeuv débol indoe a gh’è l’incudin sòtt-vent. Alter caratteristich, che pòden vèssegh, de che se capìss che l’è ‘na super-cèllula hinn: [17]
- on incav a V: adrèe a la direzion che’l temporal el ven innanz; la se forma perché l’acqua e el giazz di precipitazion hinn spostàa di fòrt vent in quòta;
- on incav caosàa del fluss de aria che l’alimenta el temporal e/o on èco a rampìn El primm el se forma per via de ona part a bassa riflettivitàa in corrispondenza del fluss in entrada, perché lilinscì la corrent ascendenta a l’è inscì fòrta de fa vegnì nò giò la pioeuva.
Inscambi l’eco a rampìn el l’è inscì perchè gh’è di acqueri girant intorna al meso-ciclon.
- Firma del vòrtes del borineri (TVS - in lengua inglesa Tornado Vortex Signature), che l’è ‘na zona indoe i color che designen i débol precipitazion hinn arent al ross che ’l designa fòrt precipitazion; quand che l’è inscì el voeur dì che gh’è ona rotazion meso-ciclònica con possibil borineri (tromba d’aria)
Variazion rispètt a la super-cèllula classica
ModifegaGh’è trii tipi de super-cèllul: classich, a bassa precipitazion (LP - da la lengua inglesa low precipitation) pussée comun in di clima sècch e a fòrt precipitazion (HP - da la lengua inglesa high-precipitation pussé comun in di clima ùmed).
Super-cèllul a dèbol precipitazion
Modifega
Ona super-cèllula a dèbol precipitazion l’è compagna de quèlla classica ma se ingenera con aria minga tròpp ùmeda e pòden portà domà scarsi precipitazion (anca se de tutt i maner la tempèsta la pò vèss puttòst gròssa) o anca nagòtt. La se sviluppa in condizion de Energia potenzial convettiva disponibil bassa e fòrbes del vent alta. Al Radar per quèl tipo de super-cèllula chì se formarà mai on eco a rampin. [18] La correnta ascendenta a l’è de sòlit pussée inclinada el so mòto l’è devià de men respètt a i alter tipi de super-cèllul e i corrent discendent hinn pussée debol sia denanz che dedrée (RFD e FFD)[19] A se reconóss a la vista per via di sò scannelladur laminàa i sui sò fianch a la base de la corrent ascendenta e per ‘na nètta torr central. [18] e l’è pussée piccola rispètt di super-cèllul classich e la se starlatta pussée a la svèlta [20] [21]
De sorapù rarament se porta adrée di tromb d’aria[22]
Super-cèllul a fòrt precipitazion
Modifega
In quèl caso chì, inveci, ancabén la struttura la sia l’istèssa de la super-cèllula classica, i vent hinn puttòst debol ai quòt pussée in alt, e hinn nò assèe fòrt de fa inclinà la corrent ascendenta. In chèla manera chì a se ingenererànn precipitazion pussèe fòrt (che ghe vann denter anca in de la correnta ascendenta principal che, de conseguenza la se indeboliss) ma la tempèsta de sòlit pussée piccola. Al radar , al contrari de la super-cèllula a debol precipitazion poden vedèss l’incav a V e l’eco a rampin. [23]
Mini-super-cèllul
ModifegaI mini super-cèllul hinn minga facil de vèss prevedùd cont i sòlit parametri tèrmodinamich (LFC, LCL…), se formen con valor del CAPE bass ( 500-100 J/kg), indes de sollevament infra 0 e -4°C, alta forbes del vent in di bass strat. [24]
Riferiment
Modifega- ↑ (2000) Glossary of Meteorology, 2nd, American Meteorological Society. ISBN 978-1-878220-34-9.
- ↑ ON THE MESOCYCLONE "DRY INTRUSION" AND TORNADOGENESIS, Archived at: Arqiviad qé: [1] , Leslie R. Lemon
- ↑ Gabriele Formentini (2009). Temporali e e Tornado (in italian). Alpha Test, 210. ISBN 978-88-483-0992-9.
- ↑ Gabriele Formentini (2009). Temporali e e Tornado (in italian). Alpha Test, 211. ISBN 978-88-483-0992-9.
- ↑ Louisville, KY. NOAA. Recuveraa el 24 January 2016.
- ↑ https://www.centrometeoitaliano.it/notizie-meteo/supercella-nei-cieli-dell-italia-suggestivo-video-in-time-lapse-del-fenomeno-21-06-2015-28587/
- ↑ <https://www.inmeteo.net/2018/08/29/shelf-cloud-nube-mensola-temporale-come-si-forma/
- ↑ (1974) "Cloud top height variability of strong convective cells". Journal of Applied Meteorology 13 (8): 918Modell:Ndash922. DOI:<0917:cthvos>2.0.co;2 10.1175/1520-0450(1974)013<0917:cthvos>2.0.co;2.
- ↑ Overshooting Tops – Satellite-Based Detection Methods. EUMETSAT (9 June 2011). Recuveraa el 10 May 2019.
- ↑ 10,0 10,1 10,2 10,3 (2009) Temporali e e Tornado (in italian). Alpha Test, 211-216. ISBN 978-88-483-0992-9.
- ↑ https://www.theweatherprediction.com/habyhints/354/
- ↑ http://www.fenomenitemporaleschi.it/cumulonembo.htm
- ↑ http://www.fenomenitemporaleschi.it/cumulonembo.htm
- ↑ 14,0 14,1 (2009) Temporali e e Tornado (in italian). Alpha Test, 226-228. ISBN 978-88-483-0992-9.
- ↑ Gabriele Formentini (2009). Temporali e e Tornado (in italian). Alpha Test, 230. ISBN 978-88-483-0992-9.
- ↑ Gabriele Formentini (2009). Temporali e e Tornado (in italian). Alpha Test, 234. ISBN 978-88-483-0992-9.
- ↑ (2009) Temporali e e Tornado (in italian). Alpha Test, 216-224. ISBN 978-88-483-0992-9.
- ↑ 18,0 18,1 Gabriele Formentini (2009). Temporali e e Tornado (in italian). Alpha Test, 234. ISBN 978-88-483-0992-9.
- ↑ Rasmussen, Erik N. (1998). "Variations in Supercell Morphology. Part I: Observations of the Role of Upper-Level Storm-Relative Flow". Mon. Wea. Rev. 126 (9): 2406–21. DOI:<2406:VISMPI>2.0.CO;2 10.1175/1520-0493(1998)126<2406:VISMPI>2.0.CO;2.
- ↑ Bluestein, Howard B. (1983). "A Synoptic and Photographic Climatology of Low-Precipitation Severe Thunderstorms in the Southern Plains". Mon. Wea. Rev. 111 (10): 2034–46. DOI:<2034:ASAPCO>2.0.CO;2 10.1175/1520-0493(1983)111<2034:ASAPCO>2.0.CO;2.
- ↑ Bluestein, Howard B. (2008). "On the Decay of Supercells through a "Downscale Transition": Visual Documentation". Mon. Wea. Rev. 136 (10): 4013–28. DOI:10.1175/2008MWR2358.1.
- ↑ RADAR CHARACTERISTICS OF SUPERCELLS. theweatherprediction.com. Recuveraa el 24 January 2016.
- ↑ Gabriele Formentini (2009). Temporali e e Tornado (in italian). Alpha Test, 235. ISBN 978-88-483-0992-9.
- ↑ Gabriele Formentini (2009). Temporali e e Tornado (in italian). Alpha Test, 234. ISBN 978-88-483-0992-9.